Memleket basshysy Moldova Respýblikasynyń jańadan sailanǵan Prezidenti Maiia Sandýdy quttyqtady, dep habarlaidy Aqorda.
Qasym-Jomart Toqaev Qazaqstan halqynyń jáne óz atynan Moldova Respýblikasynyń jańadan sailanǵan Prezidenti Maiia Sandýdy quttyqtap, jedelhat joldady.
«Sailaýdaǵy senimdi jeńisińiz Sizdiń demokratiialyq, turaqty jáne ekonomikalyq turǵydan órkendegen memleket qurý baǵytyńyz halyqtan qoldaý tapqanyn kórsetedi. Biz kúsh-jigerimizdi jumyldyra otyryp, dástúrli dostyq pen ózara tabysty yntymaqtastyqqa qurylǵan qazaq-moldova qatynastaryn nyǵaita túsemiz dep úmittenemin», – delingen jedelhatta.
Qasym-Jomart Toqaev Maiia Sandýǵa Moldova Respýblikasynyń ósip-órkendeý jolyndaǵy jaýapty memlekettik qyzmetine tolaǵai tabys tiledi.
