Foto: Aqorda
Prezident Qasym-Jomart Toqaev Qazaq-majar investitsiialyq dóńgelek ústeline qatysty, dep habarlaidy Ult.kz.
Memleket basshysy, eń aldymen, eki el arasyndaǵy ekonomikalyq qarym-qatynas qarqyndy damyp kele jatqanyn atap ótip, Býdapeshtke alǵashqy memlekettik sapary qazaq-majar strategiialyq seriktestiginiń jańa kezeńine jol ashatynyn jetkizdi.
"Biyl Qazaqstan men Majarstannyń Strategiialyq seriktestik týraly deklaratsiiaǵa qol qoiǵanyna 10 jyl toldy. Osy ýaqyt aralyǵynda biz ózara senim men ortaq maqsattarǵa negizdelgen tyǵyz yntymaqtastyqtyń irgesin qaladyq. Majarstannyń Qazaqstanǵa quiǵan investitsiiasy 370 million dollarǵa jetti. Elimizde majarlardyń 70-ten astam kompaniiasy tabysty jumys istep jatyr. Olardyń qatarynda MOL Group jáne Gedeon Richter sekildi kompaniialar bar. Qazirgi tańda mashina jasaý, aýyl sharýashylyǵy jáne logistika salalarynda jalpy investitsiia kólemi 540 million dollardan asatyn birlesken jobalardy júzege asyrý máselesi pysyqtalyp jatyr", – dedi Prezident.
Memleket basshysy Qazaqstan jańa saiasi jáne ekonomikalyq paradigmaǵa bet burǵanyn aitty. Bilim men innovatsiiany tý etken ózgerister bul úderistiń basty qaǵidatyna ainalady.
Prezident Majarstan biznesmenderine energetika, sirek kezdesetin materialdardy óndirý, kólik jáne logistika, aýyl sharýashylyǵy, farmatsevtika, tsifrlandyrý, qarjy naryǵy sekildi mańyzdy salalarda investitsiialyq yntymaqtastyqty nyǵaitýdyń keleshegi zor ekenin málimdedi.
Qasym-Jomart Toqaev sózin qorytyndylai kele, majar kompaniialarynyń basshylaryn kelesi jyly mamyr aiynda ótetin Astana halyqaralyq forýmyna qatysýǵa shaqyrdy.
Investitsiialyq dóńgelek ústel barysynda Majarstannyń Qarjy ministri, Qazaq-majar ekonomikalyq yntymaqtastyǵy jónindegi úkimetaralyq komissiianyń teń tóraǵasy Mihai Varga men iri kompaniialardyń jetekshileri sóz sóiledi.
Jiyn qorytyndysy boiynsha aýyl sharýashylyǵy, kólik infraqurylymyn tsifrlandyrý, bilim salalaryna jáne birlesken investitsiialyq jobalardy qoldaýǵa qatysty 7 kommertsiialyq qujatqa qol qoiyldy.
