Joǵary Eýraziialyq ekonomikalyq keńes alańynda Qasym-Jomart Toqaev Singapýr Premer-Ministri Li Sian Lýnmen kezdesti, dep habarlaidy "Ult aqparat" Aqordaǵa silteme jasap.
Kezdesý barysynda Memleket basshysy eki eldiń arasyndaǵy qarym-qatynastyń dostyq nietke quralǵanyn atap ótti.
– Biz sizdiń eldi qurmetteimiz. Búgingi Singapýrdyń negizin qalaǵan sizdiń ákeńiz Li Kýan Iu Qazaqstannyń Tuńǵysh Prezidenti Nursultan Nazarbaevpen jaqyn dostyq qarym-qatynasta bolǵany, onyń 90-jyldardyń basynda Qazaqstanǵa kelgeni esimizde. Eki el arasyndaǵy tyǵyz yntymaqtastyqqa berik negiz bar dep oilaimyn, – dedi Qasym-Jomart Toqaev.
Óz kezeginde Singapýr Premer-Ministri de eki el arasyndaǵy ózara qarym-qatynasty odan ári nyǵaitýǵa nietti ekenin aitty.
– Biz Qazaqstanmen aradaǵy yntymaqtastyqty odan ári damytýǵa niettimiz. Ózińizben Prezident retinde birlese jumys isteýge asyqpyn, – dedi Li Sian Lýn.
Taraptar eki jaqty saýda-ekonomikalyq, investitsiialyq bailanystardy arttyrýdy, sondai-aq, «Astana» halyqaralyq qarjy ortalyǵy aiasynda qalyptasyp kele jatqan ózara qarym-qatynastyń kókjiegin keńeitý jaiyn atap ótti.
Kezdesý sońynda Qasym-Jomart Toqaev Singapýr Premer-Ministrin elimizge arnaiy saparmen kelýge shaqyrdy.
– Biz sizdi ózińizge yńǵaily kez kelgen ýaqytta kútemiz. Sizdiń saparyńyz ózara yntymaqtastyqty damytý úshin birqatar naqty máselelerdi talqylaýǵa jaqsy múmkindik beredi,– dedi Qazaqstan Prezidenti.
