Qasym-Jomart Toqaev Ortalyq Aziia memleketteri basshylarynyń jáne Eýropalyq Keńes Prezidentiniń kezdesýine arnaiy kelgen Qyrǵyzstan Prezidenti Sadyr Japarovpen kezdesti, dep habarlaidy "Ult aqparat" Aqordaǵa silteme jasap.
Qasym-Jomart Toqaev Sadyr Japarovqa iltipat bildirip, Astanada ótetin mańyzdy jiynǵa qatysý úshin arnaiy kelgenine rizashylyǵyn bildirdi.
– Sizdiń bul saparyńyz mańyzdy. Elderimizdiń arasyndaǵy qarym-qatynastardy odan ári ilgeriletý maqsatymen eki jaqty kezdesý ótkizip otyrmyz. Memleketterimizdiń arasynda eshqandai túitkil joq. Birlesken kúsh-jigerimizdiń arqasynda osy jetistikterimiz eselenip, ekijaqty seriktestigimiz qarqyndy dami beredi dep senemin, – dedi Qasym-Jomart Toqaev.
Sadyr Japarov búgingi mańyzdy kezdesýge shaqyrǵany úshin Qazaqstan Prezidentine alǵys aitty.
– Ortalyq Aziia memleketteri basshylarynyń jáne Eýropalyq Keńes Prezidentiniń birinshi kezdesýine qatysý úshin Astanaǵa kelgenime qýanyshtymyn. Biz qyrǵyz-qazaq qarym-qatynasyn joǵary baǵalaimyz. Osy sátti paidalana otyryp, memleketterimizdiń arasyndaǵy diplomatiialyq qatynastardyń ornaǵanyna 30 jyl tolýymen quttyqtaimyn, – dedi Sadyr Japarov.
Memleketter basshylary eki el úkimetteriniń saýda salasynda birlese atqaryp jatqan jumystarynyń oń nátijelerin joǵary baǵalady. Eki el arasyndaǵy taýar ainalymy byltyrǵy osy kezeńmen salystyrǵanda 17,7 paiyzǵa ósken. Ekijaqty saýda-sattyq kólemin 2 milliard dollarǵa deiin jetkizý maqsaty josparǵa sáikes júrgizilip jatyr.
Sondai-aq taraptar qazaq-qyrǵyz qatynastarynyń kólik-logistikalyq, mádeni-gýmanitarlyq aspektilerin talqylady.
