Memleket basshysy Qasym-Jomart Toqaev Armeniia Premer-ministri Nikol Pashinianmen kezdesti, dep habarlaidy "Ult aqparat" Aqordaǵa silteme jasap.
Kezdesý barysynda ekijaqty saýda-ekonomikalyq áriptestik pen kólik-logistikalyq yntymaqtastyq máseleleri talqylandy.
Qasym-Jomart Toqaev Nikol Pashinianǵa qonaqjailyǵy men Joǵary Eýraziialyq ekonomikalyq keńes otyrysyn biik dárejede uiymdastyrǵany úshin alǵys bildire otyryp, eki el arasynda qalyptasqan senimdi dialogty atap ótti.
– Qazaq halqy armian halqyn qurmetteidi. Biz qos memleket arasyndaǵy qarym-qatynasty nyǵaitýǵa niettimiz. Eki eldiń ortasyndaǵy saýda-ekonomikalyq yntymaqtastyqqa erekshe nazar aýdarýymyz kerek. Jumysty jandandyryp qana qoimai, berik yntymaqtastyqtyń qosymsha múmkindikterin qarastyrý qajet, – dep atap ótti Qasym-Jomart Toqaev.
Nikol Pashinian ekonomika salasyndaǵy Qazaqstan men Armeniianyń ózara qarym-qatynasy odan ári jandana beretinine senim bildirdi.
– Sońǵy ýaqytta bizdiń saýda-ekonomika salasyndaǵy qarym-qatynastarymyz jańa beleske kóterildi. Biraq bizdiń áleýetimiz budan áldeqaida joǵary dep oilaimyn. Biz osy áleýetimizdi barynsha jandandyrýǵa kúsh salýymyz kerek. Óitkeni Eýraziialyq ekonomikalyq odaq bizdiń elderimiz úshin jańa múmkindikter ashyp otyr, – dedi Armeniia Premer-ministri.
