Memleket basshysy Qasym-Jomart Toqaev 5-6 jeltoqsan kúnderi Germaniiaǵa memlekettik sapary qarsańynda Deutsche Welle basylymyna suhbat berdi, dep habarlaidy "Ult aqparat".
Suhbat barysynda Qazaqstan Prezidenti tilshiniń elimizdegi qos bilik tóńiregindegi alyp-qashpa qaýesetke naqty jaýabyn berdi.
«Reseidegi bilikti berýge qatysty aitý men úshin qiyn. Sebebi ol - basqa memleket. Qazaqstanǵa qatysty aitar bolsam, bul jerde ózinshe bólek saiasi innovatsiia oryn aldy. Nursultan Nazarbaev - zor qurmetke laiyqty adam, Ult kóshbasshysy, Qazaqstan Respýblikasynyń negizin quraýshy. Men zańdy sailanǵan Prezident, Memleket basshysy, Joǵarǵy bas qolbasshy sanalamyn. Bizdiń aramyzda eshqandai qarama-qaishylyq (keide baspasóz bul taqyrypta qaýesetti kópirtýge qumar) joq. Bir-birimizben aqyldasyp otyratyndyǵymyzdy, tipti keide men onyń keńesin suraityndyǵymdy da jasyrmaimyn. Bul jerde qos bilik, tandem joq – zańdy sailanǵan Prezident bar», - dedi Qasym-Jomart Toqaev.
Sondai-aq, Prezident suhbat barysynda Germaniiaǵa memlekettik sapary barysynda 2 mlrd dollardyń kelisimine úmit artatynyn jetkizdi.
«Qazaqstan úshin Germaniia negizgi eýropalyq seriktes sanalady. Germaniianyń Ortalyq Aziiamen saýda-sattyǵynyń 86 paiyzy Qazaqstanǵa tiesili. Sapar barysynda boljamdy baǵalaýǵa sáikes shamamen 2 mlrd dollar bolatyn kelisimder men memorandýmdar toptamasyna qol qoiylady dep úmittenemin. Jalpy, Qazaqstannyń Eýropalyq odaqpen qarym-qatynasy tek qana oń. 2018 jyly Qazaqstannyń EO-men saýda-sattyǵynyń kólemi 37 mlrd dollardan asyp jyǵyldy. Bul elimizdiń barlyq syrtqy saýda ainalymynyń jartysyna teń. Bizdiń ekonomikamyzdaǵy german investitsiiasynyń 80 paiyzdan astamy shikizattyq emes sektorǵa salynǵan. Bul - óte mańyzdy», - dedi Memleket basshysy.
Qazaqstan Prezidenti Germaniia búginde mashina jasaý, resýrstyq materialdardy qaita óńdeý syndy salalarda kóshbasshy bolyp otyrǵandyǵyna nazar aýdartady.
«Sondyqtan biz yntymaqtastyqqa múddelimiz. Demek, barlyq qyzyqty salalar nemistiń áleýetti investorlaryna usynylatyn bolady. Buǵan qosa, biz olarǵa arnaiy sharttar, ózimizdiń ondaǵan arnaiy ekonomikalyq aimaǵymyzdan alań usynamyz», - dedi Qasym-Jomart Toqaev.
