مەملەكەت باسشىسى قاسىم-جومارت توقاەۆ 5-6 جەلتوقسان كٷندەرٸ گەرمانيياعا مەملەكەتتٸك ساپارى قارساڭىندا Deutsche Welle باسىلىمىنا سۇحبات بەردٸ, دەپ حابارلايدى "ۇلت اقپارات".
سۇحبات بارىسىندا قازاقستان پرەزيدەنتٸ تٸلشٸنٸڭ ەلٸمٸزدەگٸ قوس بيلٸك تٶڭٸرەگٸندەگٸ الىپ-قاشپا قاۋەسەتكە ناقتى جاۋابىن بەردٸ.
«رەسەيدەگٸ بيلٸكتٸ بەرۋگە قاتىستى ايتۋ مەن ٷشٸن قيىن. سەبەبٸ ول - باسقا مەملەكەت. قازاقستانعا قاتىستى ايتار بولسام, بۇل جەردە ٶزٸنشە بٶلەك ساياسي يننوۆاتسييا ورىن الدى. نۇرسۇلتان نازارباەۆ - زور قۇرمەتكە لايىقتى ادام, ۇلت كٶشباسشىسى, قازاقستان رەسپۋبليكاسىنىڭ نەگٸزٸن قۇراۋشى. مەن زاڭدى سايلانعان پرەزيدەنت, مەملەكەت باسشىسى, جوعارعى باس قولباسشى سانالامىن. بٸزدٸڭ ارامىزدا ەشقانداي قاراما-قايشىلىق (كەيدە باسپاسٶز بۇل تاقىرىپتا قاۋەسەتتٸ كٶپٸرتۋگە قۇمار) جوق. بٸر-بٸرٸمٸزبەن اقىلداسىپ وتىراتىندىعىمىزدى, تٸپتٸ كەيدە مەن ونىڭ كەڭەسٸن سۇرايتىندىعىمدى دا جاسىرمايمىن. بۇل جەردە قوس بيلٸك, تاندەم جوق – زاڭدى سايلانعان پرەزيدەنت بار», - دەدٸ قاسىم-جومارت توقاەۆ.
سونداي-اق, پرەزيدەنت سۇحبات بارىسىندا گەرمانيياعا مەملەكەتتٸك ساپارى بارىسىندا 2 ملرد دوللاردىڭ كەلٸسٸمٸنە ٷمٸت ارتاتىنىن جەتكٸزدٸ.
«قازاقستان ٷشٸن گەرمانييا نەگٸزگٸ ەۋروپالىق سەرٸكتەس سانالادى. گەرمانييانىڭ ورتالىق ازييامەن ساۋدا-ساتتىعىنىڭ 86 پايىزى قازاقستانعا تيەسٸلٸ. ساپار بارىسىندا بولجامدى باعالاۋعا سەيكەس شامامەن 2 ملرد دوللار بولاتىن كەلٸسٸمدەر مەن مەموراندۋمدار توپتاماسىنا قول قويىلادى دەپ ٷمٸتتەنەمٸن. جالپى, قازاقستاننىڭ ەۋروپالىق وداقپەن قارىم-قاتىناسى تەك قانا وڭ. 2018 جىلى قازاقستاننىڭ ەو-مەن ساۋدا-ساتتىعىنىڭ كٶلەمٸ 37 ملرد دوللاردان اسىپ جىعىلدى. بۇل ەلٸمٸزدٸڭ بارلىق سىرتقى ساۋدا اينالىمىنىڭ جارتىسىنا تەڭ. بٸزدٸڭ ەكونوميكامىزداعى گەرمان ينۆەستيتسيياسىنىڭ 80 پايىزدان استامى شيكٸزاتتىق ەمەس سەكتورعا سالىنعان. بۇل - ٶتە ماڭىزدى», - دەدٸ مەملەكەت باسشىسى.
قازاقستان پرەزيدەنتٸ گەرمانييا بٷگٸندە ماشينا جاساۋ, رەسۋرستىق ماتەريالداردى قايتا ٶڭدەۋ سىندى سالالاردا كٶشباسشى بولىپ وتىرعاندىعىنا نازار اۋدارتادى.
«سوندىقتان بٸز ىنتىماقتاستىققا مٷددەلٸمٸز. دەمەك, بارلىق قىزىقتى سالالار نەمٸستٸڭ ەلەۋەتتٸ ينۆەستورلارىنا ۇسىنىلاتىن بولادى. بۇعان قوسا, بٸز ولارعا ارنايى شارتتار, ٶزٸمٸزدٸڭ ونداعان ارنايى ەكونوميكالىق ايماعىمىزدان الاڭ ۇسىنامىز», - دەدٸ قاسىم-جومارت توقاەۆ.
