Qasym-Jomart Toqaev Ekonomikalyq resýrstardyń zańsyz shoǵyrlanýyna qarsy is-qimyl máseleleri jónindegi vedomstvoaralyq komissiianyń otyrysyn ótkizdi, - dep habarlaidy "Ult aqparat" Aqordanyń resmi saityna silteme jasap.
Prezident jiynǵa qatysýshylar aldynda sóilegen sózinde halyqtyń Konstitýtsiiaǵa engiziletin túzetýlerdi referendýmda qabyldaǵanyn jáne onyń zańdy túrde kúshine engenin atap ótti. Osylaisha, azamattarymyz Jańa, Ádiletti Qazaqstan qurýdy qoldady.
"Referendým aýqymdy jańǵyrtýlardy jalǵastyrýǵa jol ashty. Biz eldiń úmitin jáne senimin aqtaýǵa tiispiz. Barlyq salada bárine birdei múmkindik beriletin qoǵam qurýymyz qajet. Turǵyndar ekonomikalyq ósimniń igiligin shyn máninde kórýi kerek. Memlekettiń bailyǵy belgili bir adamdarǵa emes, barsha halyqqa tiesili. Sondyqtan, búkil halyqtyń ál-aýqatyn arttyrý - aldymyzda turǵan asa mańyzdy mindet", - dedi Prezident.
Memleket basshysy ekonomika salasyn tártipke keltirip, túsinikti ári ádil oiyn erejesin bekitý qajet dep sanaidy. Onyń aitýynsha, bul baǵytta qordalanǵan problemalar men olqylyqtar bar.
Qasym-Jomart Toqaev Jańa Qazaqstanda ekonomikalyq damýdyń basty qaǵidaty tabystyń ádil bólinýi jáne azamattardyń turmys sapasyn arttyrý bolýǵa tiis ekenin atap ótti.
"Jýyrda meniń Jarlyǵymmen ekonomikalyq resýrstardyń zańsyz shoǵyrlanýyna qarsy komissiia quryldy. Bul komissiia zańsyz jylystatylǵan qarajatty elge qaitarýmen ainalysady. Onyń jumysy udaiy qoǵam nazarynda bolady. Halyq bizden bos ýáde emes, naqty nátije kútedi", - dedi Prezident.
Prezidenttiń pikirinshe, yntymaqty, zańdylyqty jáne jaýapkershilikti minsiz saqtaý mańyzdy.
"Barlyq is-áreket quqyqtyq normalarǵa tolyq sai bolýǵa jáne zańǵa qatań ári múltiksiz negizdelýge tiis. Prokýratýra qadaǵalaýshy organ retinde qabyldanatyn barlyq rásimderdiń zańǵa tolyqtai sáikes kelýin qamtamasyz etýge mindetti. Bul máselede qatelesýge jáne biliksizdik tanytýǵa bolmaidy", - dedi Qasym-Jomart Toqaev.
Sonymen qatar Memleket basshysy vedomstvoaralyq komissiiany belsendi ári nátijeli jumys isteýge shaqyrdy.
"Komissiia jumysynyń nátijesi naqty ári sapaly bolýy kerek", - dedi Qasym-Jomart Toqaev.
Memleket basshysynyń aitýynsha, elimizden zańsyz shyǵarylǵan kapitaldy barlyq zańdy rásimderdi saqtai otyryp qaitarý úshin belgili bir ýaqyt kerek ekenin túsiný qajet.
Qasym-Jomart Toqaevtyń pikirinshe, basty maqsat sotqa berilgen qylmystyq isterdiń sany emes, ekonomikany naqty saýyqtyrý.
Prezident komissiianyń qyzmeti jóninde jurtshylyqqa júieli túrde habar taratyp otyrýdy tapsyrdy.
"Bizdiń maqsatymyz - aiqyn. Halyqtan urlanǵan aktivterdi elge qaitaryp, ádildik ornatýymyz kerek. Qazir, eń bastysy, jumysty tiimdi uiymdastyrý qajet. Komissiia músheleri osy mindetti abyroimen atqarady dep senemin. Prezident Ákimshiligi barlyq jumysty baqylaýda ustaidy", - dedi Memleket basshysy.
Sonymen qatar, jiynda Premer-ministr Álihan Smaiylov jáne Bas prokýror Berik Asylov baiandama jasady.
