Memleket basshysy Qasym-Jomart Toqaev Qazaqstannyń Tuńǵysh Prezidenti – Elbasy Nursultan Nazarbaevtyń tóraǵalyǵymen ótken Nur Otan partiiasynyń kezekten tys HH quryltaiyna qatysty, dep habarlaidy Aqorda.
Sezd delegattary aldynda sóilegen sózinde Qazaqstan Prezidenti Nur Otan partiiasy búginde el taǵdyryna jaýapty eń basty saiasi kúshke ainalǵanyn atap ótti.
Memleket basshysy Qazaqstan qazirgi ahýalǵa qaramastan strategiialyq damý maqsattaryn dáiekti túrde júzege asyryp jatqanyn aitty. Bul rette, Elbasy saiasatynyń sabaqtastyǵyn qamtamasyz etý – negizgi mindettiń biri. Qasym-Jomart Toqaev biylǵy Joldaýynda Nur Otan partiiasynyń qoǵamdaǵy jetekshilik róline joǵary baǵa bergenine toqtaldy.
Qazaqstan Prezidentiniń aitýynsha, álem ǵalamdyq ózgerister dáýirine aiaq basyp, halyqaralyq qatynastar júiesi belgisizdik jaǵdaiyna, tipti, beibereketsizdikke bet burýda. Memleket basshysy ótken ǵasyrdaǵy tereń retsessiia álemdik ekonomikany on jylǵa artqa laqtyryp tastaǵanyn, al burynǵy ósý qarqyny men turaqty damýdy qalpyna keltirý úshin úlken kúsh pen ýaqyt qajet ekenin jetkizdi.
– Qazaqstannyń turaqty damý turǵysynan múmkindigi mol. Sebebi bizde, eń aldymen, naqty damý jospary bar. Ony júzege asyrýǵa qarjylyq resýrsymyz da jetkilikti. Jaýapkershilikti sezine alatyn milliondaǵan azamattardyń qoldaýynyń arqasynda biz ishki saiasi turaqtylyqty saqtap, biznes qoǵamdastyqty qoldap, memlekettiń barlyq áleýmettik mindettemelerin oryndai alýyn qamtamasyz ete aldyq. Bizdiń buǵan qol jetkizýimizde halqymyzdyń dástúrli qundylyqtary, ózara járdemdesý, tabandylyq pen janashyrlyq sekildi qasietteri erekshe ról atqardy, – dedi Memleket basshysy.
Qasym-Jomart Toqaev koronavirýs pandemiiasymen kúreske halyqtyń úlken úles qosqanyn atap ótip, sondai qiyn-qystaý shaqta el azamattary shynaiy yntymaqtastyq pen jappai janqiiarlyq tanytqanyn aitty. Onyń sózinshe, «Biz birgemiz» urany qazaqstandyq patriotizmniń formýlasyna ainaldy.
Qazaqstan Prezidenti daǵdarys kezinde basqarýshy partiianyń da, Úkimettiń de, sondai-aq, búkil qoǵamnyń da aldynan úlken múmkindikter ashylatynyn aitty.
– Osy tarihi múmkindikti paidalaný úshin biz elimizge damýdyń jańa paradigmasyn usynýymyz qajet. Bul jerde Prezident, Úkimet jáne zań shyǵarýshy sala siiaqty bilik tarmaqtary kúsh jumyldyrýy kerek. Sondyqtan aldaǵy sailaý búkil qoǵam úshin óte mańyzdy bolmaq, – dedi Memleket basshysy.
Sonymen qatar Qasym-Jomart Toqaev Elbasy qalyptastyrǵan Bes institýtsionaldy reforma men Ult josparyn júieli jańǵyrtýǵa tyń serpin berýge shaqyrdy.
– Osy maqsatta biz 2025 jylǵa deiingi «Ózgerister joly: Ár azamatqa laiyqty ómir!» atty sailaýaldy baǵdarlamasyn qabyldaimyz. Bul - egjei-tegjeili zerdelengen, shynaiy qujat. Ekonomikadaǵy qiyndyqtarǵa qaramastan, «Nur Otan» Úkimetpen birge aldaǵy bes jyldyqta atalǵan baǵdarlamany júzege asyrý úshin 21 trillion teńge bólýdi josparlap otyr. Baǵdarlama elimizdiń áleýmettik damýyn ilgeriletýge jáne halyqtyń ál-aýqatyn arttyrýǵa baǵyttalǵan naqty sharalardyń tiimdi keshenin qamtidy. Partiia jurtshylyq tarapynan kelip túsken barlyq usynystar men talap-tilekterdi eskerdi. Bizdiń baǵdarlamany búkil elimiz daiyndady desek, artyq aitqandyq emes, – dedi Prezident.
Qasym-Jomart Toqaev atalǵan baǵdarlamany júzege asyrý úshin negizgi tórt basymdyqqa nazar aýdarylatynyn atap ótti.
Memleket basshysy birinshi mindet retinde ár azamatqa óz áleýetin iske asyrý úshin teń múmkindik beriletinin jetkizdi.
Prezident aldaǵy bes jyl ishinde áleýmettik tólemderdi indeksteý úshin 3 trillion teńgeden astam qarjy bólinetinin málimdedi. Zeinetaqy mólsheri de jyl saiyn indeksteletin bolady. Bul rette onyń ósim mólsheri infliatsiia deńgeiinen eki paiyzǵa kóp bolýy tiis.
Memleket basshysy densaýlyǵy myqty intellektýaldy ult qalyptastyrýdy partiia baǵdarlamasyndaǵy ekinshi basymdyq retinde atady. Jahandyq jańa syn-qaterlerdi eskere otyryp, bul baǵytty ilgeriletý úshin bilim, ǵylym, densaýlyq saqtaý, mádeniet jáne sport salalaryna bólinetin qarajat kóbeiedi.
– Bul – adami kapitalǵa, elimizdiń bolashaǵyna quiylǵan strategiialyq investitsiia. Densaýlyq saqtaý isine bólinetin qarjy kólemi ishki jalpy ónimniń 5 paiyzynan kem bolmaidy. Jańa yqtimal epidemiialarǵa daiyn bolý kerek, – dedi Qasym-Jomart Toqaev.
Baiandamada úshinshi basym baǵyt retinde ekonomikanyń jáne aimaqtardyń turaqty damýy aiqyndalǵany aityldy. Prezident jahan ekonomikasy uzaq toqyraýǵa ushyraǵanyn atap ótti. Degenmen ol mundai daǵdarys ekonomikany jańa úlgide qalyptastyrý úshin júieli reformalar jasaýǵa múmkindik beredi dep sanaidy.
– Álemniń barlyq ekonomika ǵalymdary men parasatty saiasatkerler adamzat tarihyndaǵy teńdessiz jahandyq daǵdarys jaǵdaiynda ekonomikalyq protsessterdi basqarýda memlekettiń róli barynsha artyp otyr degen tujyrymǵa keldi, – dedi Memleket basshysy.
Sonymen qatar Qasym-Jomart Toqaev qatań ári teńdestirilgen makroekonomikalyq saiasat, jeke menshik sektordy qoldaý, halyq aldyndaǵy áleýmettik mindetterdi oryndaý esebinen ekonomikanyń ósimin qamtamasyz etýdiń mańyzyna toqtaldy. Bul rette shyǵyndardy baqylaýdy qatań nazarda ustaý kerek.
Nur Otan baǵdarlamasyndaǵy tórtinshi basymdyq – «halyq únine qulaq asatyn memleket» jáne jaýapty azamattar.
Prezidenttiń pikirinshe, turaqty damý úshin senim men jaýapkershilikke negizdelgen memleket pen qoǵamnyń ózara is-qimyly qajet.
Bul rette Memleket basshysy bizdiń ortaq jumysymyzdyń basty baǵdary halyq múddesi men problemalary ekenin naqtylady. Prezidenttiń aitýynsha, memleket halyq úni men pikirine qulaq asýy tiis.
– Partiia jumysynyń oń koeffitsienti azamattarymyzdyń ómirin jaqsartatyn naqty sheshimderge bailanysty bolmaq. Bos sóz ben qurǵaq ýáde emes, naqty áreket qana halyq senimine jáne saiasi kóshbasshylyqqa qol jetkizýge múmkindik beredi. Sondyqtan partiia memlekettik basqarý júiesin jańǵyrtýdy myqtap qolǵa alady. Bul - strategiialyq sipattaǵy mindet, – dedi Qazaqstan Prezidenti.
Memleket basshysy óz sózinde partiianyń jańa baǵdarlamasy damyǵan azamattyq qoǵam men ekonomikalyq turǵydan tolyqqandy memleket qurýǵa baǵyttalǵanyn aitty. Qasym-Jomart Toqaev jetekshi partiianyń mártebesi bilikke qol jetkizýde emes, memleket pen halyqqa naqty paida tigizý múmkindiginde ekenin atap ótti.
– Memlekettik basqarý júiesindegi laýazymdy qyzmet ataqaratyn partiia músheleri eńbekqorlyqtyń, saiasi jaýapkershilik pen azamattyq patriotizmniń aiqyn úlgisi bolýǵa mindetti. Partiiamyzdyń músheleri bolashaqta da osy údeden tabylaryna kúmán keltirmeimin, – dedi Prezident.
Memleket basshysy sózin qorytyndylai kele, Táýelsizdigimizdiń otyz jyldyǵy Májilis jáne máslihat depýtattarynyń sailaýymen bastalyp jatqanyna, onyń simvoldyq máni zor ekenine nazar aýdardy.
– Aldaǵy sailaý qoǵamnyń birtutastyǵyn jáne bereke-birligimizdi bekemdei túsedi dep senemin. Bul naýqannyń ashyq, ádil ári zańdy ótýi úshin barlyq jaǵdaidy jasaimyz. Men, Memleket basshysy retinde, muny jiti qadaǵalaimyn, – dedi Qasym-Jomart Toqaev.
Qazaqstan Prezidentiniń Nur Otan partiiasynyń kezekten tys HH quryltaiynda sóilegen sóziniń tolyq nusqasymen myna silteme arqyly tanysa alasyz.
