Memleket basshysy Berlin eýraziialyq klýbynyń 28-otyrysyna qatysty, dep habarlaidy Aqorda.
Qasym-Jomart Toqaev jiynda sóilegen sózinde Tuńǵysh Prezident Nursultan Nazarbaevtyń bastamasymen qurylǵan Berlin eýraziialyq klýby óz mańyzdylyǵyn dáleldegenin atap ótti.
«Atalǵan dialog alańy Qazaqstan men Germaniia, Qazaqstan men Eýropa qatynastarynyń áleýmettik-saiasi jáne ekonomikalyq máselelerin keń aýqymda talqylaýǵa zor múmkindik beredi. Bul – elimizdiń Eýropadaǵy alǵashqy jobasy. Jahandyq turaqsyzdyq jaǵdaiynda mundai institýttyń róli arta túsedi dep sanaimyz», – dedi Memleket basshysy.
Prezidenttiń pikirinshe, sońǵy úsh jyl ishinde álemdegi geosaiasi, geoekonomikalyq ahýal eleýli ózgeristerge ushyrady. Sanktsiialar men saýda-sattyq shekteýler dástúrli diplomatiialyq quraldardy jii almastyra bastady.
«Álemdik ekonomika elder men óńirlerdiń damýynda disproportsiia, tehnologiialyq teńsizdik, qarjy júiesindegi álsizdik siiaqty «sozylmaly dertke» tap bolýda. Osyndai kúrdeli jaǵdaida elimizdiń syrtqy ekonomikalyq jáne saýda saiasaty ashyq, pragmativti jáne qarapaiym. Qazaqstan ártúrli birlestiktermen, eldermen jáne kompaniialarmen ózara tiimdi yntymaqtastyq ornatý úshin ashyq bolyp qala beredi», – dedi Qasym-Jomart Toqaev.
Memleket basshysy Qazaqstannyń syrtqy saiasattaǵy basymdyqtaryna toqtalyp, Eýropa odaǵymen qarym-qatynastarǵa basa mán beretinin aitty.
«Biz Eýropada bolyp jatqan oqiǵalardy muqiiat qadaǵalap otyramyz, Eýropa kóshbasshylarymen turaqty túrde syndarly dialog ornattyq. Qazaqstan Eýropa odaǵynyń Ortalyq Aziia óńirine qatysty jańa ustanymdaryna qoldaý kórsete beredi. Bizdiń Eýropamen yqpaldastyǵymyz, negizinen, Germaniiamen aradaǵy ekonomikalyq, tarihi, mádeni bailanystar boiynsha erekshelenedi», – dep atap ótti Qasym-Jomart Toqaev.
Memleket basshysy forým qatysýshylarynyń nazaryn Qazaqstannyń qarqyndy ósip kele jatqan investitsiialyq áleýetine aýdardy.
«Bizdiń kórshi eldermen tyǵyz integratsiiamyz irgeles naryqtarǵa shyǵýǵa qolaily jaǵdai jasaidy. Búginde 500-den astam adam bizben shekaralas kórshi elderde turady. Eýraziialyq ekonomikalyq odaq aiasynda eńbek qozǵalysy, qarjylyq qyzmet kórsetý, kapital jáne saýda sekildi tórt erkindik boiynsha basymdyqqa ie bolǵymyz keledi. Ortalyq Aziiadaǵy jaqyn kórshilerimizben tyǵyz yntymaqtastyǵymyzdy jalǵastyra beremiz. Sondyqtan Qazaqstanda jumys istep jatqan nemis kompaniialary úshin qosymsha naryqqa shyǵýǵa múmkindik ashylady», – dedi Qasym-Jomart Toqaev.
Prezidenttiń aitýynsha, Úkimet aýyl sharýashylyǵyna, jańa tehnologiialar men tsifrlyq qyzmetter kórsetý salalaryna nemis investitsiiasyn tartý isine qoldaý kórsetýge ázir.
«Biz «Tsifrlyq Qazaqstan» arnaiy memlekettik baǵdarlamasyn qabyldadyq. Germaniiadaǵy Fraýngofer institýty osy strategiialyq baǵdarlamany ázirleýge qatysty. Óńirimizdegi barlyq startaptarǵa qoldaý kórsetý maqsatynda Astana-hab jáne IT-ýniversitet ashtyq. 3 jyldan keiin elimizdiń IT salasynda daryndylar pýly qalyptasady dep úmittenemiz. Jalpy, biz tsifrlandyrý salasynda úkimettik qurylymdar deńgeiinde de, jeke kompaniialar deńgeiinde de yntymaqtastyq ornatýǵa daiynbyz», – dedi Qazaqstan Prezidenti.
Qasym-Jomart Toqaev Germaniiany Qazaqstannyń strategiialyq seriktesi ekenin taǵy da atap ótip, elimizdegi nemis biznesine tiisti jaǵdai jasaitynyn aitty.
«Biz sizderge barynsha jeńildikter jasaýǵa daiynbyz. Sonyń ishinde arnaiy ekonomikalyq aimaqtarda salyqtan bosatý, infraqurylym usyný jáne basqa da jeńildikter bar. Men «Qazaqinvest» pen Qazaqstannyń tikelei investitsiialar qoryna Germaniia investorlarymen yntymaqtastyq jasaityn arnaiy ofis ashý jóninde tapsyrma berdim», – dedi Memleket basshysy.
Germaniia biznesiniń elimizdegi jobalaryn iske asyrýǵa «Báiterek» holdingi men Qazaqstan damý banki qoldaý kórsetetin bolady.
«Bul elimizdiń investitsiialyq júiesi úshin jańa shara bolyp sanalady. Biz buǵan deiin eshqandai elge mundai jaǵdai jasaǵan emespiz. Osy bastama durys uiymdastyrylǵan jaǵdaida Úkimet pen investorlar muny tiimdi jumys isteitin tetikke ainaldyrady dep senemin», – dedi Qasym-Jomart Toqaev.
Berlindegi AHISA kongress-ortalyǵynda ótken is-sharaǵa GFR úkimetiniń joǵary laýazymdy qyzmetkerleri, sarapshylar, jýrnalister jáne nemis biznesiniń 250-den astam ókili qatysty.
