Qazaqstan Prezidenti DDSU-nyń Dúniejúzilik densaýlyq saqtaý assambleiasynyń arnaýly sessiiasyna qatysty, dep habarlaidy "Ult aqparat" Aqordaǵa silteme jasap.
Memleket basshysy Dúniejúzilik densaýlyq saqtaý assambleiasy arnaýly sessiiasynyń qatysýshylaryna iltipat bildirip, COVID-19 pandemiiasyna qarsy kúrestiń asa mańyzdy ekenin atap ótti. Arnaýly sessiia DDSU tarihynda ekinshi ret ótkizilip otyr. Bul atalǵan problemanyń ózektiligin kórsetedi.
– DDSU qoǵamdyq densaýlyq saqtaý jolyndaǵy osy asa kúrdeli jahandyq kúreste jetekshi ról atqardy. Uiymǵa múshe memleketterdiń bári jáne olardyń densaýlyq saqtaý júieleri aýyr jaǵdaidy bastan ótkerdi jáne qiyndyq áli de jalǵasyp jatyr. Koronavirýstyń jańa ári qaýipti shtamdary álem boiynsha tez tarala bastaǵandyqtan, aldaǵy aptalarda COVID-19 indetin juqtyrǵandar sany aitarlyqtai ósedi. Jýyrda Ońtústik Afrika ǵalymdary anyqtaǵan «Omikron» shtamy jańa qaýip tóndirip otyr, – dedi Qasym-Jomart Toqaev.
Prezidenttiń aitýynsha, pandemiia halyqaralyq qatynastarda kóptegen kemshilikti anyqtaǵan. Sondai-aq daǵdarystyń áleýmettik-ekonomikalyq saldary barlyq deńgeidegi áleýmettik qurylymdardy jan-jaqty qaita zerdeleýge májbúrledi. Pandemiia yntymaqtastyqqa jáne biologiialyq syn-qaterlerge qarsy is-qimyldardyń meilinshe tiimdi júiesine negizdelgen jańa jahandyq ádis kerek ekenin kórsetti.
– Eń aldymen, indet aldynda bizdi dármensiz qylǵan kemshilikterimizdi joiý qajet. Sondyqtan biz osy Arnaýly sessiiaǵa bir ǵana maqsatpen, iaǵni DDSU konventsiiasyn ázirleý qajettigi men onyń tetikterin nemese pandemiiaǵa jáne oǵan tótep berýge daiyndyqty qamtamasyz etý jónindegi halyqaralyq qujatty qarastyrý úshin jinalyp otyrmyz. Daiyndyq jumystary men baiandamalary úshin Dúniejúzilik densaýlyq saqtaý assambleiasynyń 74-otyrysynyń jumys tobyna alǵys aitýǵa ruqsat etińizder. Qazaqstan pandemiiaǵa daiyndyqty arttyrýǵa jáne tiisti sharalardy qabyldaýǵa baǵyttalǵan DDSU konventsiiasyna joldanǵan usynystardy qoldaidy, – dedi Memleket basshysy.
Qasym-Jomart Toqaev Qazaqstannyń DDSU-ny tolyq qoldaitynyn atap ótip, bul uiymdy senimdi áriptes retinde qarastyratynyn aitty. Memleket basshysy álemdik qaýymdastyqtyń koronavirýsqa qarsy kúresine Uiymnyń Bas direktorynyń qosqan jeke úlesin joǵary baǵalady.
– Qazirgi pandemiia densaýlyq saqtaý salasyndaǵy erekshe tótenshe jaǵdai bolyp sanalmaidy. Daǵdarys memleketterdiń jáne ulttyq densaýlyq saqtaý júieleriniń ishki qurylymdyq kemshilikterin kórsetip qana qoimai, jahandyq deńgeidegi kúrdeli ári qordalanǵan teńsizdikterdi aiqyndap berdi. Sondyqtan Qazaqstan vaktsinalardyń álem boiynsha ádil taratylýyn qoldaidy jáne oǵan belsendi túrde atsalysady. Biz 2022 jyldyń ortasyna qarai jahandyq vaktsinalaýdy qamtamasyz etý jónindegi DDSU-nyń COVID-19 indetine qarsy strategiiasyn tolyq qoldaimyz, – dedi Prezident.
Memleket basshysy jiyn qatysýshylaryna QazVac vaktsinasynyń ázirlenýi jáne onyń jańa «Delta» shtamyna qarsy sátti modifikatsiialanǵany jóninde aitty. Qazaqstandyq vaktsina óziniń tiimdiligin elimizde ǵana emes, Ortalyq Aziianyń basqa da memleketterinde dáleldedi.
– Kez kelgen aýyl nemese qaladaǵy siiaqty jahandyq deńgeidegi bizdiń órkendeýimiz, igiligimiz densaýlyq jaǵdaiymyzǵa bailanysty. Al bizdiń densaýlyǵymyz yntymaqtastyqqa jáne ortaq syn-qaterge úilesimdi tótep berýge bailanysty. Men barlyq eldi kózdelgen maqsatqa qol jetkizý úshin Dúniejúzilik densaýlyq saqtaý uiymy aiasyna birigýge shaqyramyn, – dedi Qasym-Jomart Toqaev.
