QR Prezidenti Qasym-Jomart Toqaev elimiz investitsiia tartýǵa múddeli salalardy atady, dep habarlaidy QazAqparat.
«Bizdiń memleketti damytýdyń basty faktorlarynyń biri - ózara investitsiia kólemin arttyrý. Qazaqstan aldaǵy ýaqytta da barlyq investitsiialyq mindettemelerin múltiksiz ári tolyq kólemde oryndai beretindigin erekshe atap ótkim keledi. Jalpy, «Jańa Qazaqstan» tujyrymdamasyna negiz bolǵan investitsiialyq ahýaldy jaqsartý bizdiń ekonomikalyq saiasatymyzdyń quramdasynyń biri sanalady», - dep atap ótti Qasym-Jomart Toqaev «Úndistan – Ortalyq Aziia» sammiti barysynda.
Memleket basshysy Qazaqstan taý-ken metallýrgiia kesheni, aýyl sharýashylyǵy, jasyl energetika, densaýlyq saqtaý, farmatsevtika sektory syndy keleshegi bar baǵyttarǵa investitsiia tartýǵa múddelik tanytatyndyǵyn basa aitty.
«Birlesken jobalardy júzege asyrý úshin seriktesterimizge ózin jaqsy qyrynan kórsete bilgen «Astana» halyqaralyq qarjy ortalyǵy platformasyn usynýǵa daiynbyz. Atalǵan ortalyq aǵylshyn quqyǵy negizde jumys isteidi jáne álemdik standarttarǵa jaýap beredi», - dedi QR Prezidenti.
