Almaty oblysynda Qazaqstan Qarýly Kúshteriniń tarihynda alǵash ret keshendi bitimgershilik oqý-jattyǵý jiyny ótti. Oqý-jattyǵý jiynyn Memleket basshysy Qasym-Jomart Toqaev baqylady, dep habarlaidy "Ult aqparat" Aqordaǵa silteme jasap.
Oqý-jattyǵý jiynyna desantshy-shabýyldaýshy áskerdiń, áskeri-áýe kúshterdiń, áskeri politsiianyń, áskeri meditsinalyq mekemelerdiń, Bitimgershilik daiyndyq júrgizý ortalyǵy men Minadan tazartý ortalyǵynyń myńnan astam áskeri qyzmetshileri, 100-den astam áskeri jáne arnaiy tehnika jumyldyryldy.
Oqý ortalyǵynyń komandalyq pýnktinde Joǵarǵy Bas qolbasshyǵa bitimgershilik polkiniń jumysy týraly baiandaldy. Sondai-aq qazaqstandyq bitimgershilik polkine júktelgen mindetterdi oryndaýdyń jalpy algoritmi týraly aqparat berildi. Sonymen qatar Prezidentke bitimgershilik bazanyń úlgisi tanystyryldy. Memleket basshysy oqý ortalyǵynyń injenerlik, lingvistikalyq, taktikalyq jáne meditsinalyq synyptaryn aralap kórdi.
Qasym-Jomart Toqaev bitimgershilik daiarlyq oqý ortalyǵynyń infraqurylymymen tanysqannan keiin oqý-jattyǵý jiynyn baqylady. Oqý-jattyǵý jiyny barysynda bitimgershilik kontingenttiń gýmanitarlyq júk tielgen kolonnany alyp-júrý kezindegi is-áreketteri pysyqtaldy.
Joǵarǵy Bas Qolbasshy oqý-jattyǵýlary aiaqtalǵannan keiin áskeri qyzmetkerlerdiń aldynda sóz sóiledi. Memleket basshysy Qazaqstannyń zamanaýi armiiasy Uly dalanyń erjúrek batyrlarynyń dańqy men áskeri dástúrlerin muraǵa alǵanyn atap ótip, muny árdaiym este ustaý kerek ekenin aitty.
Memleket basshysy elimizde ǵana emes, búkil álemde beibitshilik pen tynyshtyqty qamtamasyz etýdiń mańyzyn atap ótti. Onyń aitýynsha, Qazaqstan álemdegi tynyshtyqty saqtaý maqsatymen qaqtyǵys aimaqtaryna bitimgershilik áskerin turaqty jiberip otyrady.
– Bizdiń basty basymdyǵymyz – yntymaqtastyq pen áriptestik. Sizder halyqaralyq qaýipsizdikti nyǵaitýǵa úlken úles qostyńyzdar. Bitimger bolý degenimiz – álemniń elshisi bolý degen sóz. Sizder bul mindetti abyroimen atqardyńyzdar. Osyndai oqý-jattyǵý jiyndarynyń arqasynda áskeri sheberlikterińiz shyńdala túsedi. Armiiamyzdyń áskeri rýhy men dańqy odan ári arta túsetinine senimdimin, – dedi Prezident.
Memleket basshysy Tuńǵysh Prezident – Elbasynyń ózi tikelei qurǵan Qarýly Kúshterdiń bitimgershilik qyzmeti elimizdiń beibitshilik, halyqaralyq qaýipsizdik jáne turaqtylyq qaǵidattaryna is júzinde sai keletinin jetkizdi.
Prezident 2007 jyldan beri 35 qazaqstandyq áskeri qyzmetshi, onyń ishinde tórt áiel azamat BUU-nyń Nepaldaǵy, Kot-d’Ivýardaǵy, Batys Sahara men Livandaǵy missiialaryna shtab ofitserleri men áskeri baqylaýshylar retinde qatysqanyn aitty. 2018 jyly BUU mandaty negizinde áreket etetin alǵashqy qazaqstandyq rotanyń Livanǵa jiberilýi elimizdiń bitimgershilik áleýetin nyǵaitý úshin jasalǵan mańyzdy qadam.
– Qazirgi ýaqytta óz jaýapkershilik aimaǵynyń baqylaý-ótkizý beketterindegi áskeri mindetterin qazaqstandyq bitimgerler rotasynyń tórtinshi quramy atqarýda. BUU bitimgershilik áleýetiniń daiyndyq júiesindegi mindetter jelisin keńeitý úshin Qazaqstan saperlerdiń, áskeri meditsina qyzmetkerleriniń, barlaý jáne áskeri politsiianyń arnaiy bólimshelerin usyndy. Bul bólimsheler qazirgi bitimgershilik operatsiialarynda barynsha suranysqa ie, – dedi Prezident.
Joǵarǵy Bas qolbasshy bitimgershilik daiarlyq oqý ortalyǵy mundai mamandardy joǵary deńgeide daiyndaitynyna toqtaldy.
Qasym-Jomart Toqaev oqý-jattyǵý jiyny barysynda áskeri qyzmetkerlerdiń kórsetken kásibi biliktiligin atap ótip, qazaqstandyq bitimgerlerge minsiz jumystary úshin alǵys bildirdi. Memleket basshysy beibit ómirde úlken mindetterdi atqaryp otyrǵan áskerdiń airyqsha róline nazar aýdardy.
– Biyl biz el bolyp pandemiiamen kúresýdemiz. Osyndai jaýapty kezeńde áskeri qyzmetshiler árqashan aldyńǵy shepte boldy. Sarbazdar men ofitserler otandastarynyń igiligi jolynda naǵyz áskeri erliktiń úlgisin kórsetti. Pandemiiaǵa qarsy is-qimyl sharalaryna atsalysqan barsha áskeri qyzmetkerlerge alǵys bildiremin, – dedi Qasym-Jomart Toqaev.
Memleket basshysy áskeri qyzmetshilerge arnaǵan sózinde armiianyń irgetasy qatań tártipke, ulttyq qaýipsizdikti saqtaýǵa baǵyttalǵan dara basshylyqqa negizdeletinin málimdedi. Sonymen qatar Qasym-Jomart Toqaev BUU bitimgershilik kontingenti aiasynda qyzmet etý zor abyroi jáne úlken jaýapkershilik ekenin atap ótti.
Prezident BUU qurylǵan sátten beri álem kóptegen aimaqtyq jáne ultaralyq qaqtyǵystardan arylmaǵanyn ókinishpen jetkizdi. Ol barlyq qaqtyǵysty saiasi-diplomatiialyq jolmen sheshýge úndeitin Qazaqstannyń dáiekti ustanymyn, halyqaralyq quqyqtyń bazalyq qaǵidattaryn saqtaý qajettigin aitty.
– «Bitpeitin» nemese «uzaqqa sozylǵan» dep tanylǵan aimaqtyq qaqtyǵystar BUU Jarǵysynyń qazirgi halyqaralyq quqyqtyń qainar kózi jáne negizi bolyp tabylatyn basty eki qaǵidatynyń arasyndaǵy túbegeili qarama-qaishylyqtardy aiqyndady. Bul – memleketterdiń aýmaqtyq tutastyǵy men ulttardyń óz taǵdyryn ózi tańdaý quqyǵy. Sońǵy qaǵidat memleketter táýelsizdik alyp, otarlyqtan qutylǵan kezde óte ózekti bola tústi. Qazirgi ýaqytqa deiin álem óziniń damý baǵytyn anyqtady. Sondyqtan búginde memleketterdiń aýmaqtyq tutastyǵy qaǵidaty birinshi orynǵa shyǵyp, basymdyqqa ie boldy. Qazirgi qaqtyǵystarǵa baǵa berý kezinde BUU Bas Assambleiasy men Qaýipsizdik Keńesiniń qararlaryn basshylyqqa alýy tiis, – dedi Memleket basshysy.
Joǵarǵy Bas qolbasshy Qarýly Kúshterdi damytýdyń perspektivalaryna arnaiy toqtaldy.
– «Eki maqsatty kózdeitin» komponentterdi damytýǵa basymdyq berý qajet. Pandemiiamen kúres tájiribesi olardyń suranysqa ie ekenderin kórsetti. Atap aitqanda, biz áskeri-kólik aviatsiiasyn damytatyn bolamyz. Radiatsiialyq, himiialyq jáne biologiialyq qorǵanysh áskerleri óz mindetterin oryndaýǵa árqashan daiyn bolýy tiis, – dedi Qasym-Jomart Toqaev.
Prezidenttiń aitýynsha, mundai áskerlerdi zamanaýi tehnikamen jabdyqtaýǵa basymdyq berilip, bul jumysqa otandyq kásiporyndar tartylýy qajet.
Memleket basshysy áskerdi basqarýda tsifrlyq tehnologiialardy damytý qajettigine, sondai-aq, kiber jáne aqparattyq keńistiktegi taktika men áreketterdiń strategiiasyn pysyqtaýǵa kóńil bóldi.
Joǵarǵy Bas Qolbasshy serjanttar men ofitserlerdi durys daiyndamaǵan jáne yntalandyrmaǵan jaǵdaida qýatty Qarýly Kúshter qurý múmkin emes dep esepteidi.
Bizdiń basty mindetterimizdiń biri – serjanttyq quramǵa kásibi áskeri bilim berý isin damytý. Bul máseleni sheshýde «Jas Ulan» mektepteriniń jáne Kadet korpýsynyń barlyq áleýetin paidalaný qajet. Qalyptasqan jaǵdai komandirlerge de erekshe talap qoiady. Olar baqylaýshy organdar tarapynan ótkiziletin túrli sharalarǵa alańdamai, qajetti bastama men sheshim qabyldaý múmkindigine ie bolý kerek. Eger áskeri qyzmetshilerdiń tarapynan quqyq buzýshylyq derekteri anyqtalsa, olar zańǵa sáikes qatań jaýapqa tartylýy tiis. Biraq komandirlerdi jumystarynan sebepsiz ajyratýǵa jol berilmeidi. Bul máseleler quqyq qorǵaý júiesin reformalaý aiasynda qarastyrylýy kerek, – dedi Prezident.
Memleket basshysy Qarýly Kúshterdiń zamanaýi áskeri infraqurylymyn jáne materialdyq-tehnikalyq qamtamasyz etýdiń logistikalyq júiesin qurý qajettigin aitty.
Qasym-Jomart Toqaev sóziniń sońynda armiiany jáne áskeri qyzmetshilerdi áleýmettik qoldaý máseleleri árdaiym memlekettiń basty nazarynda bolatynyn atap ótti.
