Qazaqstan Respýblikasynyń Prezidenti Qasym-Jomart Toqaev «Táýelsizdik bárinen qymbat» atty maqalasynda egemendigimizdiń máńgilik úshtaǵany – úsh qundylyqty kózdiń qarashyǵyndai saqtaý kerektigin málim etti, dep habarlaidy "Ult aqparat".
«Egemendigimizdiń máńgilik úshtaǵany – Altaidan Atyraýǵa, Alataýdan Arqaǵa deiin keń kósilgen baitaq jerimiz, ananyń aq sútimen boiymyzǵa daryǵan qasterli tilimiz jáne barlyq qiyndyqtardan halqymyzdy súrindirmei alyp kele jatqan bereke-birligimiz. Biz osy úsh qundylyqty kózdiń qarashyǵyndai saqtaimyz.
Babalardan mura bolǵan qasietti jerimiz – eń basty bailyǵymyz. Qazaqqa osynaý ulan-ǵaiyr aýmaqty syrttan eshkim syiǵa tartqan joq. Búgingi tarihymyz 1991 jylmen nemese 1936 jylmen ólshenbeidi. Halqymyz Qazaq handyǵy kezinde de, odan arǵy Altyn Orda, Túrik qaǵanaty, Ǵun, Saq dáýirinde de osy jerde ómir súrgen, ósip-óngen. Qysqasha aitqanda, ulttyq tarihymyzdyń tereń tamyrlary kóne zamannyń ózeginde jatyr. Jalpy, tarihpen saiasatkerler emes, tarihshylar ainalysýy kerek», - dedi Prezident.
Memleket basshysynyń aitýynsha, shekara syzyǵyn resmi túrde halyqaralyq shartpen bekitip, ony álem jurtynyń moiyndaýy sońǵy birneshe ǵasyrda úrdiske ainaldy. Oǵan deiin qazirgidei delimitatsiia, demarkatsiia degen uǵymdar bolmaǵan.
«Biz shekara máselesin sheshýmen naqty ainalysyp jatqan kezde keibir saiasatkerler men qoǵam qairatkerleri «biz buǵan asyqpaiyq», «keiin de kelisýge bolady» dep arqany keńge salǵysy kelgeni esimizde. Kelissózderdi tabandylyqpen júrgizip, irgemizdi dereý qymtap alǵanymyz óte durys bolǵanyn ýaqyttyń ózi dáleldep berdi. Qazir kim ne aitsa da, bizdiń ekijaqty kelisimdermen bekitilip, halyqaralyq deńgeide tanylǵan shekaramyz bar. Endi oǵan eshkim daýlasa almaidy.
Aýmaqtyq tutastyǵymyzǵa kúmán keltirip, tatý kórshilik qatynastarǵa syna qaqqysy keletin keibir shetel azamattarynyń arandatýshylyq is-áreketterine resmi jáne qoǵamdyq deńgeide toitarys bere otyryp, aǵartýshylyq jumystaryn ustamdylyqpen júrgizgen jón. Biz ulttyq múddeni aspen de, taspen de qorǵaýǵa daiyn bolýymyz qajettigin taǵy da basa aitqym keledi.
Joǵaryda aitqanymdai, shekaramyz tolyǵymen shegendeldi. 2018 jyly Kaspii teńiziniń quqyqtyq mártebesi týraly konventsiiaǵa qol qoiylǵannan keiin qurlyqtaǵy ǵana emes, teńizdegi shekaramyz da birjola aiqyndalyp, túpkilikti sheshildi», - dedi Prezident.
