Prezident Qasym-Jomart Toqaev Qatar Ámiri Tamim ben Hamad Ál Tánidiń jeke shaqyrýymen «Jahandyq ekonomikany qalypqa keltirýde teńdikke qol jetkizý» atty ekinshi Qatar ekonomikalyq forýmynyń ashylý rásimine qatysty, dep habarlaidy "Ult aqparat" Aqordanyń resmi saityna silteme jasap.
Atalǵan mańyzdy is-shara Bloomberg agenttiginiń qoldaýymen uiymdastyryldy jáne sheih Tamim ben Hamad Ál Tánidiń qamqorlyǵymen ótkizilip otyr.
Forým «Memleketterdiń ekonomikalyq daǵdarystan shyǵý máselesi» taqyrybyna arnalǵan.
Forým jumysyna Memleket basshysynan bólek Togo Prezidenti For Gnassingbe, Namibiia Prezidenti Hage Geingob, Grýziianyń Premer-ministri Iraklii Garibashvili, sondai-aq Eýropa, Aziia jáne Afrika elderiniń birqatar ministri men úkimetteriniń laýazymdy tulǵalary qatysady.
Sonymen qatar forým sessiialaryna Honeywell, Asyad Group, Islam damý banki, Tesla, Qatar Airways, The Boeing Company, QatarEnergy, Kuwait Petroleum Corporation, Southwest Holdings, Accor, Marriott International, Tingo, National Petroleum Corporation of Namibia, MeTL Group, Volkswagen, Dorna Sports, International Airlines Group, Infarm, Vitol, Franklin Templeton, Thyssenkrupp, Roubini Macro Associates, DAMAC Properties, Trip com Group, Standard Chartered, Exxon Mobil Corporation, Google Cloud jáne basqa da halyqaralyq jetekshi korporatsiialar men uiymdardyń basshylary jinaldy.
Prezident Qasym-Jomart Toqaev In Conversation with President Tokayev atty arnaiy paneldik sessiiaǵa qatysady dep josparlanǵan. Ony «Bloomberg Television» júrgizýshisi Manýs Krenni júrgizedi.
Qatar ekonomikalyq forýmynyń qorytyndysy boiynsha jahandyq ósimniń kelesi kezeńiniń jospary ázirlenip, pandemiiadan keiingi álemdi qalyptastyrý úshin naqty sheshimder usyný kózdelip otyr.
