Memleket basshysy Haziret Sultan meshitine baryp, qańtar oqiǵasy kezinde qaitys bolǵan azamattardyń rýhyna quran baǵyshtaý rásimine qatysty, dep habarlaidy "Ult aqparat" Aqordanyń resmi saityna silteme jasap.
Qasym-Jomart Toqaev quran baǵyshtalǵan soń arnaiy sóz sóiledi. Qazaqstan Prezidenti biylǵy jyl elimiz úshin qaiǵyly oqiǵadan bastalǵanyn, halqymyz óte qiyn kúnderdi bastan ótkergenin aitty.
– Memleketimizdiń tutastyǵyna, azamattarymyzdyń qaýipsizdigine, elimizdiń bolashaǵyna qaýip tóndi. Biz lańkesterge der kezinde toitarys berip, betin qaitardyq. Ókinishke qarai, dúrbeleńde birqatar azamatymyz qaza tapty. Bul – naǵyz qasiret. Qazirgi tańda tiisti mekemeler azamattardyń árbir isi boiynsha tergeý jumystaryn júrgizip jatyr. Adam quqyǵyn qorǵaý máselesi men úshin asa mańyzdy. Qaiǵyly jaǵdai búkil eldiń qabyrǵasyn qaiystyrdy, – dedi Qasym-Jomart Toqaev.
Memleket basshysy osyǵan bailanysty Jalpyulttyq aza tutý kúni jariialanǵanyn eske saldy.
– Sol qasiretti oqiǵadan beri 40 kún ótti. Búgin marqumdardyń rýhyna quran baǵyshtaý úshin meshitke arnaiy keldim. Qaza bolǵan adamdardyń jaqyndaryna taǵy da kóńil aitamyn. Memleket qaraly shańyraqtardy qaraýsyz qaldyrmaidy. Men qaitys bolǵan azamattardyń otbasylaryna qarjylai kómek kórsetýdi tapsyrdym, – dedi Prezident.
Qasym-Jomart Toqaev «Qazaqstan halqyna» qory da osy qaiyrymdylyq jumysqa atsalysady dep oilaitynyn, endi halqymyzdyń tynyshtyǵyn buzýǵa jol berilmeitinin jetkizdi.
– Halqymyzdyń bereke-birligi men tynyshtyǵyn buzýǵa jol bermeimiz. Bul – biliktiń ǵana emes, barsha azamattarymyzdyń ortaq boryshy. Mundai qasiret eshqashan bolmasyn!», – dedi Memleket basshysy.
Sóziniń sońynda Prezident Qazaqstan halqyna sabyr, elimizge amandyq, jurtymyzǵa tynyshtyq tiledi Sonymen qatar óskeleń urpaq úshin tutas el bolyp Jańa Qazaqstandy birge qurýǵa shaqyrdy.
