مەملەكەت باسشىسى حازٸرەت سۇلتان مەشٸتٸنە بارىپ, قاڭتار وقيعاسى كەزٸندە قايتىس بولعان ازاماتتاردىڭ رۋحىنا قۇران باعىشتاۋ رەسٸمٸنە قاتىستى, دەپ حابارلايدى "ۇلت اقپارات" اقوردانىڭ رەسمي سايتىنا سٸلتەمە جاساپ.
قاسىم-جومارت توقاەۆ قۇران باعىشتالعان سوڭ ارنايى سٶز سٶيلەدٸ. قازاقستان پرەزيدەنتٸ بيىلعى جىل ەلٸمٸز ٷشٸن قايعىلى وقيعادان باستالعانىن, حالقىمىز ٶتە قيىن كٷندەردٸ باستان ٶتكەرگەنٸن ايتتى.
– مەملەكەتٸمٸزدٸڭ تۇتاستىعىنا, ازاماتتارىمىزدىڭ قاۋٸپسٸزدٸگٸنە, ەلٸمٸزدٸڭ بولاشاعىنا قاۋٸپ تٶندٸ. بٸز لاڭكەستەرگە دەر كەزٸندە تويتارىس بەرٸپ, بەتٸن قايتاردىق. ٶكٸنٸشكە قاراي, دٷربەلەڭدە بٸرقاتار ازاماتىمىز قازا تاپتى. بۇل – ناعىز قاسٸرەت. قازٸرگٸ تاڭدا تيٸستٸ مەكەمەلەر ازاماتتاردىڭ ەربٸر ٸسٸ بويىنشا تەرگەۋ جۇمىستارىن جٷرگٸزٸپ جاتىر. ادام قۇقىعىن قورعاۋ مەسەلەسٸ مەن ٷشٸن اسا ماڭىزدى. قايعىلى جاعداي بٷكٸل ەلدٸڭ قابىرعاسىن قايىستىردى, – دەدٸ قاسىم-جومارت توقاەۆ.
مەملەكەت باسشىسى وسىعان بايلانىستى جالپىۇلتتىق ازا تۇتۋ كٷنٸ جارييالانعانىن ەسكە سالدى.
– سول قاسٸرەتتٸ وقيعادان بەرٸ 40 كٷن ٶتتٸ. بٷگٸن مارقۇمداردىڭ رۋحىنا قۇران باعىشتاۋ ٷشٸن مەشٸتكە ارنايى كەلدٸم. قازا بولعان ادامداردىڭ جاقىندارىنا تاعى دا كٶڭٸل ايتامىن. مەملەكەت قارالى شاڭىراقتاردى قاراۋسىز قالدىرمايدى. مەن قايتىس بولعان ازاماتتاردىڭ وتباسىلارىنا قارجىلاي كٶمەك كٶرسەتۋدٸ تاپسىردىم, – دەدٸ پرەزيدەنت.
قاسىم-جومارت توقاەۆ «قازاقستان حالقىنا» قورى دا وسى قايىرىمدىلىق جۇمىسقا اتسالىسادى دەپ ويلايتىنىن, ەندٸ حالقىمىزدىڭ تىنىشتىعىن بۇزۋعا جول بەرٸلمەيتٸنٸن جەتكٸزدٸ.
– حالقىمىزدىڭ بەرەكە-بٸرلٸگٸ مەن تىنىشتىعىن بۇزۋعا جول بەرمەيمٸز. بۇل – بيلٸكتٸڭ عانا ەمەس, بارشا ازاماتتارىمىزدىڭ ورتاق بورىشى. مۇنداي قاسٸرەت ەشقاشان بولماسىن!», – دەدٸ مەملەكەت باسشىسى.
سٶزٸنٸڭ سوڭىندا پرەزيدەنت قازاقستان حالقىنا سابىر, ەلٸمٸزگە اماندىق, جۇرتىمىزعا تىنىشتىق تٸلەدٸ سونىمەن قاتار ٶسكەلەڭ ۇرپاق ٷشٸن تۇتاس ەل بولىپ جاڭا قازاقستاندى بٸرگە قۇرۋعا شاقىردى.
