Prezident «Altyn sapa» jáne «Paryz» baiqaýlarynyń jeńimpazdaryn saltanatty marapattaý rásimine qatysty, dep habarlaidy "Ult aqparat" Aqordanyń baspasóz qyzmetine silteme jasap.
Memleket basshysy bul konkýrstyń dástúrli túrde ótkizilip kele jatqanyn atap ótip, 2005 jyldan beri shaǵyn jáne orta biznestiń ishki jalpy ónimdegi úlesi úsh ese óskenin jáne qazir el ekonomikasynyń 34 paiyzyna jýyqtaǵanyn aitty.
– Búginde osy salada 3,5 millionnan astam adam jumys isteidi. Bul – eńbek etetin halyqtyń 40 paiyzy degen sóz. Taǵy bir jetistik: byltyr óńdeý ónerkásibiniń eksporty rekordtyq kórsetkishke – jiyrma milliard dollarǵa jetti. Osy jyldyń sońyna deiin jalpy quny 2 trillion teńge bolatyn 160 joba júzege asyrylady. Sonyń nátijesinde 17 myń jańa jumys orny ashylady, – dedi Qasym-Jomart Toqaev.
Prezident aldaǵy jeti jylda kásipkerlik belsendilikti shekteitin barlyq kedergini joiýǵa kúsh salynatynyn aityp, biznesti órkendetý úshin naqty sharalar qabyldana beretinine toqtaldy.
– Biznesti retteýdiń jańa tásilderi. Basynan bastap retteý institýtyn engizýge bir jyl qaldy. Úkimet biznestiń damýyna kedergi keltiretin artyq talaptardy anyqtaý jóninde aýqymdy jumys júrgizdi. Ekonomikanyń túrli salasynda jańa retteý saiasatyna sai kelmeitin 6,5 myńnan astam talap anyqtaldy. Endi Úkimet «Atameken» palatasymen birlesip, zańnamaǵa jáne normativtik-quqyqtyq aktilerge tiisti ózgeristerdi jedel engizýi kerek. 2024 jyldyń basynan bastap jańa tásilderge is júzinde kóshýimiz qajet, – dedi Prezident.
Memleket basshysynyń aitýynsha, biznesti negizsiz jáne shekten tys baqylaýǵa, qylmystyq qýdalaýǵa jol berýge bolmaidy. Kásipkerlerdi negizsiz tekserýlerden qorǵaýǵa, qylmystyq protseske zańsyz tartýdy boldyrmaýǵa baǵyttalǵan keshendi sharalar qazirden bastap qolǵa alynyp jatyr.
– Biyl 6 myńnan astam kásipker jalpy quny shamamen 700 million teńge bolatyn zańsyz aiyppuldan bosatyldy. Zańsyz salynǵan 1200 tyiym salý jáne shekteý sharalarynyń kúshi joiyldy. Kásipkerlerge qatysty zańsyz is-áreketi úshin myńnan asa laýazymdy tulǵa jaýapqa tartylǵanyn atap ótken jón. Árbir altynshy is qylmystyq quqyqbuzýshylyq belgileri bolmaýyna bailanysty toqtatyldy. Biyldan bastap azamattyq tártip negizinde shaǵymdanýdyń barlyq múmkindigi paidalanbaiynsha, qylmystyq is qozǵaýǵa tyiym salyndy. Sonymen qatar ótken jyldardyń oń nátijesine súiene otyryp, usaq jáne shaǵyn biznes sýbektilerin tekserýge jariialanǵan moratoriidi taǵy bir jylǵa sozý jóninde sheshim qabyldadym. Tiisti Jarlyqqa qol qoiyldy, – dedi Memleket basshysy.
Prezident elimizde shynaiy indýstriialandyrý úshin qolaily orta qalyptastyrý isi dáiekti túrde júrgizilip jatqanyn atap ótip, «Ónerkásiptik saiasat týraly» arnaiy zań qabyldanǵanyn jetkizdi. Onyń aitýynsha, bul qujat joǵary jáne ortasha óńdeý deńgeiindegi ónim óndirýshilerge keń kólemde qoldaý sharalaryn usynady. Alaida zańnyń keibir normalarynyń qoldanysy áli kúnge deiin «kibirtiktep tur».
– Qazaqstandyq óndirýshiler otandyq shikizattyń qoljetimdi emes ekenine jii shaǵymdanady. Iri taý-ken, metallýrgiia kásiporyndary óńdelgen ónim shyǵarǵannan góri resýrsty syrtqa tasyǵandy qolaily kóredi. Qazaqstandyq óńdeý ónerkásibine shikizat qoljetimdiligi tómen. Bul kabel ónimderi, akkýmýliator, aliýminii buiymdar men basqa da joǵary óńdeý deńgeiindegi taýarlarǵa qatysty. Úkimet árbir aryz-shaǵymdy qarastyryp, qajetti júieli sharalardy qabyldaǵany jón. Qaitalap aitamyn, ýaqytsha emes, júieli sharalar kerek, – dedi Memleket basshysy.
Prezident agrobiznes ekonomikalyq damýdyń taǵy bir qozǵaýshy kúshine ainalýǵa tiis ekenin atap ótip, onyń azyq-túlik qaýipsizdigin qamtamasyz etý jáne azyq-túlik infliatsiiasy úshin strategiialyq mańyzy bar sala ekenine toqtaldy. Sondai-aq kúzgi jiyn-terin naýqanyn sátti aiaqtaǵan sharýalarǵa rizashylyǵyn bildirdi.
– Fermerlerge memleket tarapynan qoldaý kórsetý mindetti túrde jalǵasyn tabady. Osy jyldan bastap aýyl sharýashylyǵy tehnikasyn jeńildikpen lizingke alý úshin beriletin qarjynyń kólemi 40 milliard teńgege kóbeidi. Sonyń arqasynda diqandarymyz bir myńnan astam qosymsha tehnika alý múmkindigine ie boldy. Sondai-aq egin egý jáne ony jinaý jumystaryna jeńildikpen nesie berý kólemi eki ese artty. Al diqandarǵa jeńildikpen beriletin janar-jaǵarmai ónimderiniń kólemi 820 myń tonnaǵa deiin ósti. 2023 jyldan bastap kókónis ónimderin shyǵarý úshin fermerlerge aldyn ala, iaǵni forvardtyq nesie berý baǵdarlamasy iske qosylady. Osy maqsatqa shamamen 100 milliard teńge qarjy bólinedi, – dedi Memleket basshysy.
Qasym-Jomart Toqaev aýyl halqynyń ál-aýqatyn arttyrý jáne turmys sapasyn jaqsartý óziniń sailaýaldy baǵdarlamasynda kórsetilgen negizgi basymdyqtyń biri ekenin jetkizdi. Sondyqtan kelesi jyldyń alǵashqy toqsanynda Aýyldyq jerlerdi damytý jónindegi tujyrymdama qabyldanady.
Sonymen qatar Prezident kelesi jyldan bastap «Paryz» baiqaýynyń jeńimpazdaryn anyqtaý kezinde qosymsha talaptar bolatynyn atap ótti. Onyń aitýynsha, bul – erekshe qajettilikteri bar azamattar úshin qoljetimdi orta qalyptastyrýǵa úles qosý. Bul – memleketimiz ben biznestiń azamattarymyz aldyndaǵy ortaq boryshy.
Jiyn sońynda Memleket basshysy «Altyn sapa» jáne «Paryz» baiqaýlarynyń jeńimpazdaryn saltanatty túrde marapattady.
«Altyn sapa» syilyǵynyń «Úzdik indýstriialyq joba» nominatsiiasy boiynsha Pavlodar oblysynyń «Prommashkomplekt» kásiporny, «Úzdik innovatsiialyq joba» nominatsiiasy boiynsha Almaty oblysynyń «Antigen» ǵylymi-óndiristik kásiporny jeńimpaz atandy.
«Paryz» syilyǵynyń shaǵyn jáne orta biznes ieleri arasyndaǵy Gran-pri júldesi Aqmola oblysynyń «Shýiskoe-XXI» jaýapkershiligi shekteýli seriktestigine, al iri biznes ieleri arasyndaǵy Gran-pri júldesi Atyraý oblysynyń «Nort Kaspian Opereiting Kompani N.V.» kásipornyna tabystaldy.
Sonymen qatar bizneske qolaily jaǵdai jasalǵan «Úzdik óńir» sanaty boiynsha arnaiy syilyqqa Shymkent qalasynyń ákimdigi, «Úzdik aýdan» sanaty boiynsha arnaiy syilyqqa Sátbaev qalasynyń ákimdigi ie boldy.
