Memleket basshysy – Qazaqstan Respýblikasy Qarýly Kúshteriniń Joǵarǵy Bas qolbasshysy Qasym-Jomart Toqaev «Aibalta-2019» strategiialyq komandalyq-shtabtyq oqý-jattyǵýyna bardy, dep habarlaidy "Ult aqparat" Aqordaǵa silteme jasap.
Memleket basshysyna «Aibalta-2019» komandalyq-shtabtyq oqý-jattyǵýynyń negizgi kezeńderi men mindetteri týraly baiandaldy. Oqý-jattyǵý barysynda shartty qarsylasty joiý kezindegi Qarýly Kúshterdiń múmkindikteri kórsetildi.
Qazaqstan Prezidenti komandalyq pýnktke baryp, áskeri tehnikalar men qarý-jaraq úlgilerin, infraqurylymdyq nysandardy, sonyń ishinde modýldi jyljymaly gospitaldi, mehanikalandyrylǵan nan zaýytyn, azyq-túlik qoimasyn, pilotsyz ushatyn apparattardy basqarý pýnktin aralap kórdi.
Joǵarǵy Bas qolbasshy áskerilerdi oqý-jattyǵýdy tabysty aiaqtaýymen, sondai-aq, aldaǵy Otan qorǵaýshylar kúni jáne Jeńis kúni merekelerimen quttyqtap, qyzmetterine tabys tiledi.
– Qarýly Kúshterdiń basty mindeti – Táýelsizdik pen el aýmaǵynyń tutastyǵyn qorǵaý. Memlekettiń senimdi qalqany ári tiregi sanalatyn Qazaqstan armiiasy – kúshti ári mobildi. Búgin sizder táýelsiz Qazaqstannyń Qarýly Kúshteriniń qýatyn kórsettińizder. Áskeri bólimsheler kásibi daǵdylary men jaýyngerlik rýhyn is júzinde dáleldedi, – dedi Qasym-Jomart Toqaev.
Memleket basshysy dalaǵa tigilgen áskeri lagerge baryp, «soldat botqasynan» dám tatty, qatardaǵy sarbazdarmen áńgimelesti.
.jpeg)