Memleket basshysy Qazaqstanǵa resmi saparmen kelgen Eýropalyq Keńestiń Prezidenti Sharl Mishelmen kelissóz júrgizdi, dep habarlaidy "Ult aqparat" Aqordaǵa silteme jasap.
Qasym-Jomart Toqaev Sharl Mishelge iltipat bildire otyryp, Eýropalyq Odaqpen strategiialyq seriktestikti damytý árqashan Qazaqstannyń basty syrtqy saiasi basymdyqtarynyń biri bolǵanyn atap ótti.
– Sizdiń saparyńyz Qazaqstan men Eýropalyq Odaq arasyndaǵy seriktestiktiń barlyq salasynda qol jetkizgen mańyzdy jetistikterdi aitýǵa jaqsy múmkindik beredi. Kelesi jyly mereili datany – diplomatiialyq qarym-qatynastardyń 30 jyldyǵyn atap ótemiz. Sizdiń Qazaqstanǵa resmi saparyńyz ózara qarym-qatynasymyzdy jańa deńgeige kóterýge múddeli ekenimizdi bildiredi, – dedi Qazaqstan Prezidenti.
Qasym-Jomart Toqaev Qazaqstan Eýropalyq Odaqpen Keńeitilgen seriktestik jáne yntymaqtastyq týraly kelisimge qol qoiǵan Ortalyq Aziiadaǵy alǵashqy el ekenin atap ótti.
Memleket basshysynyń aitýynsha, joǵary deńgeidegi turaqty bailanystar Qazaqstan men EýroOdaq arasyndaǵy jan-jaqty dialogty damytýǵa zor múmkindik beredi.
Óz kezeginde Eýropalyq Keńes Prezidenti Sharl Mishel Qasym-Jomart Toqaevqa qonaqjailylyǵy úshin alǵys aityp, Qazaqstan men EO arasyndaǵy yntymaqtastyqtyń qarqyndy damyp kele jatqanyna kóńili tolatynyn atap ótti.
– Biz alǵash Briýsselde kezdestik. Sodan beri tyǵyz bailanys ornatyp, túrli salada jumys istep kelemiz. Óńirlik deńgeide birlesken jumys júrgizý mańyzdy. Sizben yntymaqtastyǵymyzdyń ózekti máselelerin, sonyń ishinde klimattyń ózgerýine qatysty máseleni talqylaý maqsatymen kezdeskenime qýanyshtymyn, – dedi Sharl Mishel.
Kezdesýde taraptar energetika jáne azyq-túlik qaýipsizdigi, «jasyl» ekonomikany damytý, kólik jáne logistika máselelerin jan-jaqty talqylady. Sonymen qatar olar Ortalyq Aziia – Eýropalyq Odaq formatyndaǵy yntymaqtastyqty damytý máseleleri jóninde pikir almasty.
