Memleket basshysy Qasym-Jomart Toqaev Eýropalyq Keńes prezidenti Sharl Mishelmen telefon arqyly sóilesti, dep habarlaidy Aqorda.
Taraptar álemdegi koronavirýs indetiniń taralýyna qatysty qazirgi ahýaldy jáne onyń saldaryn joiý jónindegi birlesken sharalardy talqylady.
Sharl Mishel elimizde COVID-19 virýsynyń odan ári taralýyna jol bermeý úshin Qazaqstan Prezidentiniń naqty is-qimyldary men sheshimderine joǵary baǵa berdi. Onyń aitýynsha Qazaqstan Ortalyq Aziia aimaǵyndaǵy Eýropalyq odaqtyń asa mańyzdy seriktesi sanalady. Osy rette elimizdiń indetke qarsy kúres jónindegi halyqaralyq jáne óńirlik is-sharalarǵa atsalysýynyń mańyzy zor ekenin, onyń Briýsselde joǵary baǵalatynyn jetkizdi.
Eýropalyq Keńestiń basshysy Qazaqstan Prezidentiniń shaǵyn jáne orta biznesti qoldaý, azamattardy jumyspen qamtý, memlekettiń halyq aldyndaǵy áleýmettik mindettemelerin oryndaý maqsatynda daǵdarysqa qarsy qabyldaǵan is-sharalaryn erekshe atap ótti. Qasym-Jomart Toqaev memlekettiń áleýmettik-ekonomikalyq turaqtylyǵyn qamtamasyz etý úshin Qazaqstannyń naqty sheshimder qabyldaitynyn aitty.
Áńgimelesý barysynda Memleket basshysy Eýroodaq ókiline pandemiiaǵa qarsy kúres boiynsha Reseidiń, Qytaidyń jáne Ortalyq Aziiadaǵy birqatar elderdiń basshylarymen telefon arqyly júrgizgen kelissózderdiń qorytyndylary týraly aqparat berdi.
Sonymen qatar Qazaqstan Prezidenti BUU Bas hatshysy Antoniý Gýterrishtiń koronavirýsqa qarsy kúreske baǵyttalǵan, onyń ishinde, halyqaralyq qarjylandyrý (5 trln. dollar) arqyly álemdegi álsiz memleketterge kómek kórsetý jónindegi gýmanitarlyq josparyn ilgeriletý jaiyndaǵy bastamasyn qoldaitynyn aitty.
Taraptar Qazaqstan men Eýropalyq odaqqa múshe elder arasyndaǵy qatynastardyń qazirgi jaǵdaiy men damý perspektivalary, atap aitqanda, Qazaqstan men Eýropalyq odaq arasyndaǵy Seriktestik pen yntymaqtastyqty keńeitý týraly jańa kelisimdi júzege asyrý týraly pikir almasty.
Memleket basshysy atalǵan qujattyń saiasi dialogty odan ári nyǵaitýdyń, Qazaqstan men Eýropalyq odaq arasyndaǵy ózara tiimdi saýda-ekonomikalyq jáne investitsiialyq yntymaqtastyqty arttyrýǵa berik negiz bolatynyn málim etti.
Cóz sońynda taraptar óńirlik jáne jahandyq kún tártibindegi birqatar ózekti máselege nazar aýdardy. Atap aitqanda, Sharl Mishel Astana formaty aiasynda ótken Siriia kelissózderiniń prespektivasyna qyzyǵýshylyq tanytty. Qasym-Jomart Toqaev Siriiadaǵy qaqtyǵysty beibit jolmen retteý jónindegi Jeneva protsesin jalǵastyratyn kelissózderdiń kezekti kezeńin ótkizý úshin Qazaqstannyń óz alańyn usynýǵa daiyn ekenin naqtylady.
Telefon arqyly sóilesýge eýropalyq tarap bastamashy boldy.
