Qazaqstan Prezidenti Qasym-Jomart Toqaev Túrkiia Prezidenti Rejep Taiip Erdoǵanǵa quttyqtaý jedelhatyn joldady, dep habarlaidy "Ult aqparat" Aqordaǵa silteme jasap.
Memleket basshysy Qasym-Jomart Toqaev Túrkiia Prezidenti Rejep Taiip Erdoǵandy týǵan kúnimen quttyqtap, túrik halqynyń igiligi jolyndaǵy asa jaýapty memlekettik qyzmetine tabys tiledi.
– Sizdiń pármendi kóshbasshylyǵyńyz ben saraly saiasatyńyzdyń arqasynda Túrkiia óziniń turaqty damýyn jalǵastyryp, azamattarynyń yrys-berekesin eseleýde, yqpaldy aimaqtyq jáne halyqaralyq aktor retinde mereiin ústem etýde mol tabystarǵa qol jetkizýde. Osy tusta, elińizdiń tyń belesterdi baǵyndyrýyna baǵyttalǵan mańyzdy bastamalaryńyz ben josparlaryńyzdyń laiym ońynan shyǵýyna tilektestigimdi bildiremin, – delingen jedelhatta.
Qasym-Jomart Toqaev Rejep Taiip Erdoǵannyń eki el arasyndaǵy baýyrlastyq rýhyndaǵy yntymaqtastyqtyń jyldan-jylǵa órkendeýine, strategiialyq áriptestik aiasynyń keńeiýine qosqan úlesin óte joǵary baǵalady.
– Biik deńgeidegi mazmundy dialog pen ekijaqty qarym-qatynastardy halyqtarymyzdyń igiligi úshin nyǵaita túsýge daiyndyǵymdy qýattap, memleketterimiz múddelik tanytatyn kún tártibindegi ózekti máselelerdi talqylaý maqsatynda Ózińizben Qazaqstanda júzdesetinime úmit artamyn, – dep jazylǵan Qazaqstan Prezidentiniń quttyqtaýynda.
Memleket basshysy Túrkiia Prezidentine qajymas qairat, zor baqyt, al túrik halqyna baq-bereke tiledi.
