Elimizge memlekettik saparmen kelgen Túrkiia Prezidenti Rejep Taiip Erdoǵanǵa Qazaqstan Respýblikasynyń I dárejeli «Dostyq» ordeni tabys etildi, dep habarlaidy "Ult aqparat" Aqordanyń resmi saityna silteme jasap.
Ordendi tabystaý rásiminde Qasym-Jomart Toqaev Túrkiia Prezidentin elin alǵa bastap kele jatqan naǵyz kóshbasshy dep atap ótti.
– Sizdiń syndarly saiasatyńyzdyń arqasynda Túrkiianyń álemdegi abyroi-bedeli arta tústi. Elińizdi dúniejúzi áleýeti zor, damyǵan memleket retinde biledi, qurmetteidi. Túrkiia – bizdiń ejelden enshisi bir, tamyrlas týysymyz. Sondai-aq Qazaqstannyń eń jaqyn ári senimdi strategiialyq seriktesi, – dedi Memleket basshysy.
Qazaqstan Prezidentiniń aitýynsha, qos halyqtyń arasyndaǵy baýyrlastyq bailanys – ózara tiimdi qarym-qatynastyń altyn dińgegi. Bul iske Rejep Taiip Erdoǵan orasan zor úles qosyp keledi.
– Men ony joǵary baǵalaimyn. Ásirese, týysqan elderdi ortaq múddege uiystyryp, tamyrymyzdy tereńdetý úshin erekshe eńbek sińirip júrsiz. Bastapqyda keńes retinde qurylyp, búginde tolyqqandy uiymǵa ainalǵan Túrki memleketteri uiymy – osynyń aiqyn dáleli. Odan bólek, bitimgershilik rólińizdi erekshe atap ótkim keledi. Biz sizdiń dúniejúzindegi daǵdarystar men aimaqtaǵy máselelerdi sheshý jolyndaǵy bastamalaryńyzdy qoldaimyz, – dedi Qasym-Jomart Toqaev.
Memleket basshysy Qazaqstan Túrkiiamen strategiialyq áriptestikke negizdelgen kópqyrly yntymaqtastyqty nyǵaitýǵa múddeli ekenin aityp, bolashaqqa birge qadam basatynyn atap ótti.
– Osy joldaǵy máńgi dostyǵymyz ben myzǵymas baýyrlastyǵymyz jalǵasa beredi. Siz qazaq-túrik qatynasyn turaqty damytýǵa ólsheýsiz úles qosyp kelesiz. Men osy saladaǵy airyqsha tarihi rólińizdi eskere otyryp, sizdi I dárejeli «Dostyq» ordenimen marapattaý týraly sheshim qabyldadym. Bul sheshim ekijaqty qarym-qatynastar jylnamasyna altyn árippen jazylary sózsiz. Men dostyǵymyzdy nyǵaityp, bereke-birligimizdi arttyra túsý úshin bar kúsh-jigerimdi jumsaýǵa daiynmyn, – dedi Prezident.
