Qazaqstan Prezidenti Qasym-Jomart Toqaev Dúniejúzilik saýda uiymynyń bas direktory Ngozi Okondjo-Ivealamen video konferentsiia formatynda kezdesý ótkizdi. Kelissóz barysynda Qazaqstan men Dúniejúzilik saýda uiymy arasyndaǵy yqpaldastyqty nyǵaitýdyń perspektivalary qarastyryldy, dep habarlaidy Aqorda.
Qasym-Jomart Toqaev Ngozi Okondjo-Ivealany jýyrda Dúniejúzilik saýda uiymynyń Bas direktory qyzmetine sailanýymen quttyqtap, atalǵan uiymmen aradaǵy tyǵyz yntymaqtastyq elimizdiń basymdyqtarynyń biri ekenin atap ótti.
Kezdesýde Qazaqstannyń tóraǵalyǵymen ótetin DSU-ǵa múshe elder ministrleriniń 12-shi konferentsiiasyna daiyndyq máselelerine erekshe nazar aýdaryldy.
«Biz úshin biylǵy qarashanyń sońy jeltoqsannyń basynda ótetin DSU-ǵa múshe elder ministrleriniń 12-shi konferentsiiasyna tóraǵalyq etý úlken mártebe. Qazaqstan Úkimeti ortaq is-sharamyzdyń barlyq mazmundyq jáne uiymdastyrýshylyq máselelerine qatysty pysyqtaý jumystary boiynsha DSU Hatshylyǵymen tyǵyz yqpaldastyq ornatady», – dedi Memleket basshysy.
Prezidenttiń aitýynsha, Qazaqstan kópjaqty saýda júiesin belsendi jaqtaityn bolǵandyqtan, Konferentsiianyń naqty nátije ákelýine múddeli. Sondai-aq kún tártibindegi barlyq sheshilmegen máselelerdi talqylaýǵa óz tarapynan konstrýktivti túrde úles qosýǵa daiyn ekenin jetkizdi.
Memleket basshysy DSU Bas direktoryna Qazaqstannyń koronavirýsqa qarsy kúreste qabyldap jatqan sharalary týraly málimet berdi. Taraptar pandemiiaǵa qarsy kúresti, sonyń ishinde, vaktsina men meditsinalyq qural-jabdyqtarǵa jalpy qoljetimdilikti qamtamasyz etýge baǵyttalǵan jahandyq kúsh-jigerdi talqylady.
Qasym-Jomart Toqaev DSU basshysynyń jetekshiligi boiynsha Uiymǵa múshe eldermen, vaktsina óndirýshi memlekettermen jáne qoljetimdi vaktsinaǵa muqtaj eldermen júrgizilip jatqan syndarly dialogty tolyq qoldaitynyn aitty.
«Dúniejúzilik saýda uiymy qajetti meditsinalyq taýarlardyń jetkizilýin jáne vaktsinaǵa ádiletti qoljetimdilikti qamtamasyz etýde mańyzdy ról atqarýy tiis dep esepteimiz. Osyǵan bailanysty Úkimetke saýda jáne densaýlyq saqtaý salasyndaǵy bastamalarǵa qatysty elimizdiń ustanymyn, atap aitqanda, ministrlerdiń 12-shi konferentsiiasyna qatysty tiisti sheshim ázirleýge qomaqty úles qosýdy tapsyrdym», – dedi Prezident.
Óz kezeginde, Ngozi Okondjo-Iveala Qazaqstannyń COVID-19 indetine qarsy kúrestegi kúsh-jigerin joǵary baǵalap, otandyq QazVac vaktsinasynyń ázirlenýimen quttyqtady.
Dúniejúzilik saýda uiymynyń basshysy alda bolatyn ministrlerdiń 12-shi konferentsiiasyna daiyndyq barysy týraly aita kele, Prezidentke atalǵan is-shara aiasynda ótetin biznes-forýmdy uiymdastyrýǵa Qazaqstannyń qatysý múmkindigin qarastyrýdy usyndy. Sondai-aq Qasym-Jomart Toqaevty Jenevada ótetin konferentsiiaǵa shaqyrdy.
Kezdesý sońynda Qasym-Jomart Toqaev Ngozi Okondjo-Ivealany ózine yńǵaily ýaqytta Qazaqstanǵa saparmen kelýge shaqyrdy.
