Memleket basshysy Qasym-Jomart Toqaev «Nemetskaia volnaǵa» suhbat berdi, dep habarlaidy "Ult aqparat" QR Prezidentiniń Baspasóz hatshysy Berik Ýálige silteme jasap.
Qazaqstan Prezidenti Qasym-Jomart Toqaev Germaniiaǵa josparlaǵan resmi saparynyń qarsańynda «Nemetskaia volna» teleradiokompaniiasyna suhbat berdi.
Memleket basshysy Kantsler Angela Merkelmen júrgizetin aldaǵy kelissózder, ekijaqty qarym-qatynastardyń ahýaly jóninde aitty.
– Germaniia – Qazaqstannyń negizgi eýropalyq seriktesi. Germaniianyń Ortalyq Aziia elderimen jasaityn saýda-sattyǵynyń 86 paiyzy Qazaqstanǵa tiesili. Sapar barysynda quny shamamen eki milliard dollar bolatyn kelisimder men memorandýmǵa qol qoiylady dep úmittenemin.
Jalpy, Qazaqstan men Eýropalyq odaqtyń qarym-qatynastary óte jaqsy. 2018 jyly Qazaqstannyń Eýroodaqpen jasaǵan saýda kólemi 37 milliard dollardan asty. Bul – elimizdiń búkil syrtqy saýda ainalymynyń jartysy. Bizdiń ekonomikamyzǵa salynǵan Germaniia investitsiiasynyń 80 paiyzdan astamy shikizat emes sektorǵa tiesili. Bul óte mańyzdy.
Germaniia mashina jasaý, resýrstyq materialdardy óńdeý jáne basqa da salalar boiynsha álemdik kóshbasshy sanalady. Sondyqtan biz bul elmen yntymaqtastyq ornatýǵa múddelimiz. Barlyq múddeli salalardy áleýeti zor nemis investorlaryna usynatyn bolamyz. Sonymen qatar olarǵa erekshe jaǵdai jasap, onshaqty arnaiy ekonomikalyq aimaǵymyzdan oryn beremiz, – dedi Memleket basshysy.
Qazaqstannyń ishki saiasatyna qatysty da birqatar másele sóz boldy. Atap aitqanda, saiasi júie jáne ekonomikalyq qurylys modeliniń – reseilik pe álde eýropalyq pa – qaisysy elimiz úshin jaqyn degen máselege Qasym-Jomart Kemeluly ózimizdiń qazaqstandyq úlgige beiildilik tanytatynyn aitty.
– Biz ózimizdiń úlgini jasaýǵa tyrysamyz. Demokratiiany damytýǵa umtylamyz. Aitpaqshy, keibir jýrnalisterdiń ártúrli pikirlerine qaramastan, Qazaqstan Respýblikasynda demokratiia bar. Elimizde biz qoldaý kórsetip otyrǵan 3500-den astam úkimettik emes uiym jumys isteidi. Ulttyq qoǵamdyq senim keńesine belgili jýrnalister, qoǵam qairatkerleri, blogerler, ekonomister engen. Men olarmen únemi aqyldasyp, keńesip otyramyn. Doing business (biznes júrgizýge qolaily jaǵdai jasaý sapasyn anyqtaityn Búkilálemdik bank indeksi) kórsetkishi boiynsha Qazaqstan álemde 25-orynda. Bul koeffitsient boiynsha Reseiden alda turmyz, – dedi Prezident.
Sonymen qatar Memleket basshysy elimizdiń syrtqy saiasi baǵdarynyń basymdyqtaryn egjei-tegjeili túsindirip berdi.
Aita keteiik, Deutsche Welle (nemis. Nemis tolqyny) nemese DW – jumysyn 1953 jyldyń 3 mamyrynda Kelnnen qysqa tolqyndyq radio arnasy retinde bastaǵan nemis memlekettik halyqaralyq tele jáne radio kompaniiasy. Qazirgi kezde «DW» 30 tilde, sonyń ishinde nemis, aǵylshyn, orys, ispan, frantsýz, túrik, arab jáne t.b. tilderinde habar taratady. Dóichevéleniń aǵylshyn tilindegi 24 saǵattyq teledidarlyq jańalyqtar arnasy búkil álemge taralady jáne 197 millionnan astam aýditoriiany qamtidy.
Eske salsaq, 5-6 jeltoqsanda Qazaqstan Prezidenti Qasym-Jomart Toqaev Germaniia Federativtik Respýblikasyna resmi saparmen baratyndyǵy týraly habarlaǵan bolatynbyz.
