Aqordada Memleket basshysynyń tóraǵalyǵymen Ulttyq banktiń 2021 jylǵy jumysy týraly esebin tyńdaýǵa arnalǵan keńes ótti, dep habarlaidy "Ult aqparat" Aqordaǵa silteme jasap.
Qasym-Jomart Toqaev 2021 jyly júzege asyrylǵan aqsha-kredit saiasatynyń qorytyndylary, infliatsiiany tejeý jáne qarjylyq turaqtylyqty qamtamasyz etý sharalary, biýdjet kirisin arttyrý, Ulttyq banktiń altynvaliýta rezervi men Ulttyq qordaǵy aktivterdiń jaǵdaiy týraly baiandamalardy tyńdady.
Budan bólek Prezidentke depozitterdi dollarmen salý deńgeiiniń 36,0 paiyzǵa deiin tómendegeni, memlekettik qundy qaǵazdaǵy naryqtyq investorlardyń úlesi 69,2 paiyzǵa deiin kóbeigeni jáne halyqtyń qolma-qol aqshasyz tólem jasaý operatsiialarynyń kólemi 73,1 trillion teńgege deiin jetkeni jóninde baiandaldy. 2021 jyly depozitter 27,1 trillion teńgege deiin, sonyń ishinde teńgemen salynǵan depozitter 17,3 trillion teńgege deiin ósti.
Memleket basshysy elimizde qabyldanǵan sharalardyń arqasynda Qazaqstan ekonomikasynyń ósimi 2021 jyly 4,1 paiyz bolǵanyn atap ótti. Sonymen qatar infliatsiianyń ósimi buryn-sońdy bolmaǵan deńgeige kóterilgenine nazar aýdaryp, biylǵy tórt aidyń qorytyndysy boiynsha 2016 jyldyń qyrkúieginen beri eń sharyqtaý shegine, iaǵni 13,2 paiyzǵa jetkenin aitty. Prezident atalǵan máselelerdi sheshý úshin Úkimettiń, Ulttyq banktiń jáne basqa da memlekettik organdardyń jumysyn kúsheitý mańyzdy ekenine toqtaldy.
Osy rette Qasym-Jomart Toqaev infliatsiiany belgilengen shekti mejege qaitarýdyń mańyzdy ekenin atap ótti, sondai-aq Úkimetke Ulttyq bankpen birlesip, Infliatsiia deńgeiin baqylaý jáne tómendetý jónindegi 2022-2024 jyldarǵa arnalǵan keshendi sharalardyń tolyqqandy júzege asyrylýyn qamtamasyz etýdi tapsyrdy.
Memleket basshysy Ulttyq qordyń jumysyna arnaiy toqtalyp, pandemiia jaǵdaiynda jáne ekonomikalyq ahýal nasharlaǵan kezde Qor óz mindetin tolyq oryndaǵanyn atap ótti. Prezident Ulttyq qordyń qarjysyn tiimdi paidalaný qajettigine mán berdi.
– Ulttyq qordan jasalǵan transfertter 2020 jyly 4,8 trillion teńgeni, al 2021 jyly 4,5 trillion teńgeni qurady. Biyl Úkimet taǵy da 4,6 trillion teńge suratyp otyr. Bul – óte qomaqty qarjy. Respýblikalyq biýdjet Ulttyq qordyń qarajatyn paidalanýǵa súienbeýi kerek. Transfertterdi birtindep azaitý qajet, – dedi Prezident.
Budan bólek Qasym-Jomart Toqaevqa aktsiialar naryǵynyń ósýine orai teńgerimdi allokatsiiaǵa kóshý jóninde baiandaldy. Bul sońǵy 3 jyl ishinde Qordyń kirisin 10,75 milliard dollarǵa jetkizýge múmkindik berdi.
Memleket basshysy Úkimetke iri jobalardy naryqtyq mehanizmder, memlekettik-jekemenshik seriktestikter, qaryz qarajattary, respýblikalyq biýdjet qarjysyn qaita bólý esebinen júzege asyrý múmkindikterin pysyqtaýdy tapsyrdy. Atap aitqanda, Qasym-Jomart Toqaev elimizdiń tranzittik áleýetin kúsheitýge, sonyń ishinde «Dostyq-Moiynty» temirjol ýchaskesi men basqa da birqatar memleketaralyq temirjol dálizin jańǵyrtýǵa nazar aýdardy.
Sonymen qatar jiynda Ulttyq qordyń investitsiialyq kirisin arttyrý, aktivterdi tiimdi basqarý, altynvaliýta rezervteriniń ótimdiligi men saqtalýyn qamtamasyz etý máseleleri qarastyryldy.
Keńes barysynda Prezident tólem teńgeriminiń tapshylyǵyna qatysty máseleni kóterdi jáne ony birtindep azaitý qajet ekenin atap ótti.
Ulttyq banktiń ókilderi ulttyq tólem júiesin damytý jumystarynyń nátijeleri týraly da aitty. 2021 jyly Ulttyq tólem júiesiniń Tólem kartalarynyń bankaralyq júiesi men Jedel tólem júiesi siiaqty komponentteri pilottyq rejimde iske qosylǵan. Sondai-aq tsifrlyq teńge platformasynyń prototipin ázirleý jumystary aiaqtalǵan.
Prezident jiyndy qorytyndylai kele, Ulttyq banktiń jyldyq esebin maquldady.
– Álemdegi qazirgidei kúrdeli kezeńde elimizdiń qarjylyq turaqtylyǵyn qamtamasyz etý óte mańyzdy. Ulttyq bank Qarjy naryǵyn retteý jáne damytý agenttigimen birlesip, aqsha-nesie saiasatynyń tiimdiligin arttyrýǵa basa mán berýi qajet jáne qarjy sektorynyń áleýetin maqsatty túrde kúsheitýi kerek, – dedi Qasym-Jomart Toqaev.
Jiynǵa Ulttyq banktiń tóraǵasy Ǵalymjan Pirmatov, Prezident Ákimshiligi Basshysynyń birinshi orynbasary Timýr Súleimenov, Premer-ministrdiń orynbasary Erulan Jamaýbaev, Qarjy naryǵyn retteý jáne damytý agenttiginiń tóraǵasy Mádina Ábilqasymova, Ulttyq ekonomika ministri Álibek Qýantyrov, sondai-aq Ulttyq bank tóraǵasynyń orynbasarlary qatysty.
