Qazaqstan Prezidenti BUU Bas Assambleiasynyń tóraǵasy Volkan Bozkyrmen kezdesý ótkizdi, dep habarlaidy "Ult aqparat" Aqordanyń baspasóz qyzmetine silteme jasap.
Kezdesý barysynda Qazaqstan men Birikken Ulttar Uiymy arasyndaǵy yntymaqtastyqtyń basym baǵyttary talqylandy. Pandemiiaǵa qarsy kúrestegi birlesken is-qimyldarǵa, sondai-aq, óńirlik qaýipsizdik pen turaqtylyqty qamtamasyz etýge erekshe nazar aýdaryldy.
Prezident Qasym-Jomart Toqaev BUU Bas Assambleiasynyń tóraǵasy Volkan Bozkyrdyń Qazaqstan men aimaqqa jasaǵan sapary Ortalyq Aziianyń róli artyp kele jatqanyn kórsetetinin atap ótti.
– Ortalyq Aziiada bolyp jatqan ahýaldy baǵalaý turǵysynan Sizdiń bul saparyńyz asa mańyzdy. Atalǵan aimaq jahandyq saiasat aiasynda zor mańyzǵa ie bolyp kele jatyr. Ózińizdi BUU Bas Assambleiasynyń sailanǵan tóraǵasy retinde kórgenime qýanyshtymyn. Sizdiń osy jaýapty ári mańyzdy missiiańyz tabysty bolady dep oilaimyn. Biz Birikken Ulttar Uiymyn mýltilateralizmniń dińgegi retinde qarastyramyz. Qazaqstan BUU-nyń maqsattaryn tolyq qoldaidy. Assambleia Sizdiń dana basshylyǵyńyzben Uiymnyń maqsatyna qol jetkizýine, ásirese, qalypty ómirdiń barlyq salasyna áser etken pandemiianyń teris saldary kezinde eleýli úles qosady, – dedi Qazaqstan Prezidenti.
Memleket basshysy halyqaralyq qoǵamdastyqtyń pandemiia saldaryna qarsy kúreste judyryqtai jumylýy qajet dep sanaidy.
– Qazaqstan halyqaralyq qoǵamdastyqtyń jaýapty múshesi retinde daǵdarystyń saldaryn eńserý úshin barlyq kúsh-jigerin jumsaidy. Biz ózimizdiń tól vaktsinamyzdy ázirledik. Keleshekte, qajet bolǵan jaǵdaida, ony muqtaj elderge usynýǵa daiynbyz, – dedi Prezident.
Volkan Bozkyr Qasym-Jomart Toqaevqa jyly qabyldaǵany úshin alǵys aityp, Qazaqstannyń BUU Qaýipsizdik Keńesine tóraǵalyǵynyń qorytyndylaryn, sondai-aq, Siriia qaqtyǵysyn retteý úshin júrgizgen jumystaryn joǵary baǵalady.
– Qazaqstan Birikken Ulttar Uiymynyń jumysyna óte belsendi atsalysady. Siz BUU júiesinde kóp jyl jumys istedińiz. Tájiribeńiz mol. Eldiń basshylyǵy da Uiymmen belsendi yqpaldastyq jasaidy. Qazaqstannyń Siriia qaqtyǵysyn Astana protsesi retinde belgili beibit jolmen retteýge qosqan úlesin qoldaimyn, – dedi BUU Bas Assambleiasynyń tóraǵasy.
Sonymen qatar áńgimelesý barysynda Aýǵanstandaǵy ahýalǵa bailanysty óńirlik qaýipsizdik pen turaqtylyqty qamtamasyz etý máseleleri de sóz boldy.
