Qazaqstan Prezidenti Qasym-Jomart Toqaev Qorǵanys ministrligi alqasynyń keńeitilgen otyrysyna qatysty, dep habarlaidy "Ult aqparat" Aqordaǵa silteme jasap.
Jiynǵa Prezident Ákimshiliginiń Basshysy B.Saǵyntaev, Prezidenttiń kómekshisi – Qaýipsizdik keńesiniń hatshysy Q.Qasymov, Premer-Ministrdiń birinshi orynbasary – Qarjy ministri Á.Smaiylov, Ulttyq ekonomika ministri R.Dálenov, sondai-aq Qorǵanys ministrliginiń basshylyq quramy qatysty.
Qazaqstan Prezidenti – Joǵarǵy Bas qolbasshy Qasym-Jomart Toqaev Elbasynyń turaqty qoldaýynyń arqasynda Qazaqstanda yqsham, mobildi jáne soǵysqa qabiletti armiia quryldy. Onyń negizgi missiiasy – memlekettiń egemendigi men aýmaǵynyń tutastyǵyn qorǵaý ekenin aitty.
– Qarýly Kúshterdiń basshylyq quramynyń aldynda bolyp jatqan ózgeristerge beiimdelý ǵana emes, sondai-aq aldyn alý jumystary tur. Bul qaýip-qaterlerge jan-jaqty taldaý jasaýdy talap etedi. Búginde biz geosaiasi qaishylyqtardyń shielenise túskenine, jańa qaqtyǵystardyń paida bolǵanyna kýá bolyp otyrmyz. Áskeri is-qimyldardy júrgizýdiń formalary men tásilderi ózgerdi, dáldigi joǵary qarýlar men basqa da zamanaýi qarý-jaraqtardyń úlesi artty. Sondyqtan, men «Aibalta» oqý-jattyǵýy kezinde Qorǵanys ministrine Qarýly Kúshterdi qurý jáne damytý tujyrymdamasyna tiisti ózgerister engizý jóninde tapsyrma berdim, – dedi Qazaqstan Prezidenti.
Memleket basshysy Qorǵanys ministrliginiń basshylyǵyna sheshim qabyldaý ýaqytyn barynsha qysqartý úshin basqarý júiesin jańǵyrtýdy mindettedi. Sondai-aq, robottandyrý, tsifrlyq tehnologiia, jasandy intellekt jáne ushqyshsyz basqarý júiesin engizýdiń mańyzdylyǵyn aitty.
– Eń aldymen, qarý-jaraqtardy tehnologiialyq turǵydan jetildirý jáne jańǵyrtý esebinen áskeri áleýetti odan ári nyǵaitýdy qamtamasyz etý qajet. Keshendi qaita qarýlaný aiasynda ásker qarý men tehnikanyń zamanaýi úlgilerimen qamtamasyz etiledi. Qarýly Kúshter basshylyǵy tabandylyq tanytyp, dáiekti ári júieli tásil qoldanýy jáne qarjylyq tártipti saqtaýy kerek, – dedi Qasym-Jomart Toqaev.
Qazaqstan Prezidenti jaýyngerlik daiyndyqtyń deńgeiin kóterý men shuǵyl áreket etý, áskeri bilim berý júiesin jetildirý máselelerine arnaiy toqtaldy. Onyń aitýynsha, oqý-jattyǵý baǵdarlamalary túrli jaǵdailardy, urys júrgizýdiń zamanaýi formalary men ádisterin, qarý-jaraq pen tehnikanyń jańa túrlerin úiretip, qoldanýy tiis.
– Mamandardy daiarlaý jáne áskeri-patriottyq tárbie berý isinde bolashaq áskeri injenerlerdi, IT mamandaryn, robotty tehnikalardy, jasandy intellekt boiynsha mamandardy tárbielep shyǵarý kerek. Olar «SMART» dep atalatyn býyn. «Jas sarbaz» qozǵalysynyń bazasynda, ásirese fizika-matematika boiynsha tereńdete oqytylatyn mektepterde «SMART-SARBAZ» úiirmelerin qurýdy usynamyn, – dedi Qasym-Jomart Toqaev.
Memleket basshysy kelesi aptaǵa josparlanǵan bitimgerlik jóninde ótetin forým, aldaǵy ýaqytta Qazaqstannyń belsendi bitimger-memleket retindegi mártebesin arttyryp, bul baǵyttaǵy áleýetine tyń serpin beretinin jetkizdi. Onyń aitýynsha, Qazaqstan jaiaý áskerlerdi ǵana jibermei, BUU bitimgerlik missiiasyna asa qajetti injener-saper, barlaýshy, dárigerler quramy jáne basqa da bólimshelerdi jiberý arqyly kókjiegin keńeitýi qajet.
Otyrys barysynda Qasym-Jomart Toqaev áskeri tártip pen áskerilerdiń rýhyn kúsheitý, olardy áleýmettik turǵydan qamtamasyz etý deńgeiin kóterý qajettigin atap ótti.
– 2017-2018 jyldary áskerilerdiń jalaqylary ósip, synyptyq qosymshalar tólene bastady. Jýyrda áskeri ushqyshtardyń jalaqylary eki ese artty. Jańa júie boiynsha áskerilerdi baspanamen qamtamasyz etý máseleleri sheshilýde. Bul keste jalpy alǵanda ozyq bolǵanmen, turǵyn úi tóleminde aýytqýshylyqtar bar. Garnizondardyń turǵyn úi qoryn jańartý qajet. Máseleni qordalandyrmai shuǵyl sheshý kerek. Sonda ǵana áskeri qyzmettiń jáne áskerilerdiń áleýmettik mártebesin kóteremiz, – dedi Qazaqstan Prezidenti.
Joǵarǵy Bas qolbasshy is-sharadan soń Qorǵanys ministrliginiń strategiialyq basqarý ortalyǵynyń jumysymen tanysty.
