Foto: Akorda.kz
Memleket basshysy "Báiterek" ulttyq basqarýshy holdingi" AQ basqarma tóraǵasy Nurlan Baibazarovty qabyldady, - dep habarlaidy "Ult aqparat" Aqordanyń resmi saityna silteme jasap.
Qasym-Jomart Toqaevqa holdingtiń 2023 jylǵy qyzmetiniń nátijesi, sonyń ishinde kásipkerlik pen agroónerkásip keshenine qoldaý kórsetý, halyqty turǵyn úimen qamtamasyz etý jumystary jóninde esep berildi.
Prezidentke byltyr holding aktiviniń ósimi 12 paiyz bolǵany týraly baiandaldy. Kompaniialar tobynyń investitsiialyq jáne kredittik portfeli 10 paiyzǵa artqan. Al taza tabysy 7 paiyzǵa jetip, 400 milliard teńgeden asqan.
Nurlan Baibazarovtyń aitýynsha, ekonomikanyń naqty sektoryn damytý sheńberinde "Báiterek" iri jobalar men lizingtik mámilelerdi qarjylandyrý kórsetkishin 24 paiyzǵa, mikro, shaǵyn jáne orta biznestegi jobalardy qarjylandyrý josparyn 42 paiyzǵa asyra oryndady. Qazaqstannyń Damý banki men Ónerkásipti damytý qorynyń jelisi boiynsha 300 joba men lizingtik mámile qarjylandyrylyp, 1,061 trillion teńge igerildi. Bul – rekordtyq kórsetkish. Agroónerkásip keshenine 554,7 milliard teńge investitsiia quiylyp, josparlanǵan kólemnen 11 paiyzǵa asty. Sondai-aq 2023 jyly holdingtiń enshiles kompaniialary arqyly qurǵaqshylyq pen ylǵaldyń shamadan tys bolýynan zardap shekken 1,1 myń fermerge 48 milliard teńge somasynda kómek kórsetildi.
Memleket basshysyna byltyr holding arqyly 2 million sharshy metrden astam turǵyn úi paidalanýǵa berilgeni jóninde baiandaldy. Turǵyn úi sektoryna 317,6 milliard teńge investitsiia salynǵan. "Otbasy bank" aktsionerlik qoǵamynyń ipotekalyq baǵdarlamalary aiasynda jalpy somasy 1 trillion teńgeden astam qaryz berildi.
Kezdesýde holdingtiń 2024 jylǵa arnalǵan bastamalary týraly aityldy. Onyń ishinde agroónerkásip kesheni jobalaryna 370 milliard teńge investitsiia quiý jáne 4 myńnan astam jańa jumys ornyn ashý, óńdeý ónerkásibin, týristik salany qarjylandyrý, qaldyqtardy qaita óńdeitin jáne suryptaityn zaýyttar salý, 9-20-25 turǵyn úi baǵdarlamasyn iske qosý siiaqty sharalar bar.
Qasym-Jomart Toqaevqa "Báiterek" holdinginiń bastamalaryn júzege asyrý nátijesinde onyń el ekonomikasyna qosatyn úlesi jyl sońyna qarai 2022 jylmen salystyrǵanda eki ese artatyny jaiynda baiandaldy.
Memleket basshysy ekonomikalyq ósim men halyqtyń turmys sapasyn jaqsartý úshin jańa baǵdarlamalardy iske qosý jáne keshendi tásilderdi qoldaný mańyzdy ekenin atap ótti. Sonymen qatar holdingtiń ekonomikany ártaraptandyrý jáne strategiialyq máni zor salalardy damytý baǵytyndaǵy jumysyn jandandyrý jóninde birqatar tapsyrma berdi.
