Qazaqstan Prezidenti – Qarýly Kúshterdiń Joǵarǵy Bas qolbasshysy Qasym-Jomart Toqaev elordada áskeri jiynǵa shaqyrylǵan aýmaqtyq qorǵanys brigadasynyń áskeri qyzmetshilerimen kezdesti, dep habarlaidy Aqordanyń baspasóz qyzmeti.
Sondai-aq Qarýly Kúshterdiń tehnikalyq daiyndyǵyn jáne qala ákimdiginiń Tótenshe jaǵdaidy qamtamasyz etý jónindegi jumysyn tekserdi.
Qorǵanys ministri Nurlan Ermekbaev Qarýly Kúshterdiń Joǵarǵy Bas qolbasshysyna elimizdegi áskeri qyzmetin óteýge mindetti azamattardy arnaiy jiynǵa shaqyrý barysy, koronavirýs pandemiiasyna qarsy kúreste áskeri qyzmetshilerdiń tehnikalyq jáne jaýyngerlik jabdyqtalýy týraly baiandady.
Nur-Sultan qalasynyń ákimi Altai Kólginov elordanyń qazirgi ahýaly, onyń ishinde, azyq-túlikpen, meditsinalyq qorǵanys quraldarymen qamtamasyz etý, qalada dezinfektsiia jumystaryn júrgizý, qosymsha juqpaly aýrýlar aýrýhanasyn salý jaiynda egjei-tegjeili esep berdi.
Qasym-Jomart Toqaev ministr men ákimniń esepterin tyńdaǵannan keiin dezinfektsiialaý jumystaryna erekshe mán berýdi tapsyrdy. Mundai jumystar, ásirese, iri qalalarda keń kólemde júrgizilýi kerek.
– Nysandardy kúzetý, kóshedegi tártipti saqtaý asa mańyzdy mindet ekeni túsinikti. Degenmen, qazirgi jaǵdaida basty mindet – dezinfektsiia jasaý. Bul – óte qaýipti virýs. Sondyqtan dezinfektsiia jasamasa, eshqandai oń nátije bolmaidy, – dedi Prezident.
Memleket basshysy Tótenshe jaǵdai rejiminiń barlyq talaptaryn buljytpai oryndaý qajet ekenin aitty.
– Shaǵyn biznesti shyǵaramyz dep jatyrmyz. Jalpy qalanyń turǵyndary karantin rejimin mindetti túrde saqtaýy kerek. Onsyz bolmaidy, – dedi Qasym-Jomart Toqaev.
Memleket basshysy áleýmettik mindettemelerdi oryndaýdyń jáne meditsina qyzmetkerlerine syiaqy tóleýdiń mańyzdy ekenin atap ótti. Sonymen qatar jańa juqpaly aýrýlar emhanasyn salý máselesine arnaiy toqtaldy.
– Kelesi aptada atalǵan emhanany baryp kóremiz. Bul emhana óte qysqa merzimde salynyp jatyr. Onyń qurylysy bar-joǵy eki aptanyń ishinde bitýi kerek. Eń aldymen, onyń sapasyna erekshe mán berý qajet, – dedi Prezident.
Qasym-Jomart Toqaev jiynǵa shaqyrylǵan áskeri qyzmetshilerdiń aldynda sóilegen sózinde olardyń el úshin qyzmet etýge kelgenderine rizashylyǵyn bildirdi.
– Barshańyzǵa shynaiy alǵysymdy bildiremin. Sizder óte mańyzdy jumys atqaryp jatsyzdar. Bul – naǵyz patriotizmniń kórinisi. Qazir adamdardyń kóbi patriotizm, Otanǵa degen súiispenshilik týraly kóp áńgime aitady. Biraq naqty iske kelgende buǵyp qalady. Al sizder elimiz, Otanymyz úshin óz erikterińizben osynda qyzmet etýge kelip otyrsyzdar. Sondyqtan barshańyzǵa shyn júrekten alǵys aitamyn, – dedi Joǵarǵy Bas qolbasshy.
Prezident halqymyzdyń osy ýaqytsha qiyndyqty eńseretinine senim bildirdi.
– Qazirgi ahýal kúrdeli. Biraq bárimiz bir ult, bir halyq bolyp osy qiyndyqtardy jeńip shyǵatynymyzǵa eshqandai kúmánim joq. Bári jaqsy bolady. Biz, eń aldymen, qarapaiym halyqqa kómek kórsetip jatyrmyz. Biýdjetten, Ulttyq qordan qyrýar qarjy bólindi. Eń aldymen bizdiń aldymyzda turǵan maqsat – qarapaiym halyqqa koldaý kórsetý. Halyqsyz eshqandai ekonomika bolmaidy. Sondyqtan patriotizm degen bul qasietti uǵymdy naqty ispen dáleldeý kerek, – dedi Qasym-Jomart Toqaev.
