Qazaqstan Prezidenti Reseidiń Astrahan oblysynyń gýbernatory Igor Babýshkindi qabyldady, dep habarlaidy Aqorda.
Kezdesý barysynda Qasym-Jomart Toqaev Qazaqstan men Resei Federatsiiasy arasyndaǵy strategiialyq jáne odaqtastyq qatynastardyń qarqyndy damyp kele jatqanyn jáne eki el óńirleriniń yqpaldastyǵy keńeie túskenin atap ótti. Osy rette Óńiraralyq yntymaqtastyq forýmy tiimdi dialog alańyna ainalyp otyr.
Qazirgi ýaqytta Atyraý, Batys Qazaqstan, Mańǵystaý jáne Qazaqstannyń ózge de oblystary Astrahan oblysymen kóptegen baǵyt boiynsha ózara tiimdi kooperatsiiany júzege asyrýda. Ekonomikalyq belsendiliktiń jańǵyrýyna orai shekara mańyndaǵy saýda qarqyny birtindep qaita qalpyna kelip jatqany baiqalady.
Qazaqstan men Astrahan oblysynyń arasyn negizgi bailanystyrýshy retinde Resei boiynsha eń kóp turatyn sol jerdegi qazaq diasporasy mańyzdy ról atqaryp otyr.
Prezident Astrahan qazaqtarynyń tarihi otanymen rýhani bailanystaryn nyǵaitýyna, ata-babalarynyń tili men mádenietin saqtaýyna jan-jaqty qoldaý kórsetip jatqany úshin Igor Babýshkinge rizashylyǵyn bildirdi.
Memleket basshysy qazaq halqynyń Bókei han, Qurmanǵazy, Dina Nurpeiisova jáne basqa da uly perzentteriniń esimin Astrahan jerinde ulyqtap kele jatqany úshin aimaq ákimshiligi men turǵyndaryna alǵys aitty.
