Aqordada joǵary áskeri jáne arnaýly ataqtar, synyptyq shender, sondai-aq, áskeriler men quqyq qorǵaý organdarynyń qyzmetkerlerine saltanatty túrde ordender men medaldar tapsyrý rásimi ótti, dep habarlaidy "Ult aqparat" Aqordaǵa silteme jasap.
Qasym-Jomart Toqaev jiynǵa qatysýshylardy Otan qorǵaýshy kúnimen jáne Jeńis meiramymen quttyqtap, halqymyzdyń erlik dástúrin tanytatyn qos mereke biyl Táýelsizdigimizdiń 30 jyldyǵy aiasynda ótip jatqanyn aitty.
– Egemendiktiń qadir-qasieti – jerdiń tutastyǵy men eldiń tynyshtyǵynda. Osy asyl qundylyqtardy Qarýly Kúshterimiz qas qaqpai kúzetip tur. Táýelsizdik jyldarynda Tuńǵysh Prezidentimiz, Elbasy Nursultan Ábishuly Nazarbaevtyń arqasynda memleketimizdiń myqty qorǵanys júiesin qalyptastyrdyq. Áskerimizdiń bes qarýyn sailadyq. Sarbazdarymyzdyń jaýyngerlik rýhyn kóterip, kásibi mashyǵyn shyńdadyq. Búginde armiiamyz – eldigimizdiń berik qalqany, Táýelsizdigimizdiń myzǵymas tuǵyry, – dedi Prezident.
Qasym-Jomart Toqaev Qazaqstannyń beibitshilik pen turaqtylyqty qalaityn memleket ekenin atap ótti. Biraq ulttyq múddege nuqsan keltiretin kez-kelgen áreketke toitarys bere alamyz. Sońǵy ýaqytta jer júzinde túrli qaqtyǵystar kóbeiip ketti.
– Sarapshylar alpaýyt memleketter arasyndaǵy tartystardy qyrǵi-qabaq soǵys kezeńindegi ahýalmen teńestirýde. TMD aýmaǵynda, tipti, irgeles kórshi elderde janjaldar paida bolyp jatyr. Eski daýlarǵa qazirgi túitkilder qosylyp, jaǵdai kúrdelene tústi. Bul – bárimizdi alańdatyp otyrǵan másele. Sondyqtan arqany keńge salmai, ulttyq qorǵanys isinde temirdei tártip saqtaýymyz kerek. Bizdiń áskerimiz jáne barlyq Kúshtik qurylymdar syrttan kelgen qaýip-qaterge toitarys berýge árdaiym saqadai-sai daiyn bolýǵa tiis, – dedi Memleket basshysy.
Prezident óz sózinde armiia men Kúshtik qurylymdar elimizdiń egemendigi men ulttyq qaýipsizdiktiń basty kepili sanalatynyn aitty. Jahandyq ózgerister men geostrategiialyq turaqsyzdyq jaǵdaiynda álemde áskeri qyzmetshilerdiń róli birneshe ese arta túsedi. Búginde Qazaqstandy ózge jurttar óńirlik jáne halyqaralyq turaqtylyqtyń uiytqysy retinde moiyndaidy. Áskeri qyzmetshiler BUU-nyń bitimgershilik missiiasy aiasynda ózderine júktelgen mindetti tabysty atqarýda. Al ulttyq qaýipsizdik organdarynyń qyzmetkerleri «Jýsan» arnaiy operatsiiasyn minsiz oryndady. Politsiia men prokýratýranyń qyzmeti kezeń-kezeńimen jetildirilip keledi.
– Meniń tapsyrmam boiynsha quqyq qorǵaý júiesin reformalaý jumystary bastaldy. Onyń tiimdi júzege asyrylýy halyqtyń bilik institýtyna degen senimin edáýir arttyryp, qoǵamdaǵy quqyqtyq tártip pen áleýmettik ádildikti nyǵaitýǵa septigin tigizedi. Elimizdiń qorǵanys qabiletin kúsheitý úshin memleket áskeri daiyndyq pen Qarýly Kúshterdi jabdyqtaýǵa basa mán beredi. Áskeri qyzmetshilerdiń, quqyq qorǵaý organdary qyzmetkerleriniń jalaqysy ósip, áleýmettik turǵydan qorǵalýy birtindep jaqsaryp keledi. Áskeri qyzmetshilerge jan-jaqty qoldaý kórsetý memlekettiń airyqsha nazarynda bolady, – dedi Memleket basshysy.
Qasym-Jomart Toqaev elimizde óz ómirin Otan qorǵaýǵa arnaǵan kásibi mamandar az emes ekenin erekshe atap ótip, búgingi marapat pen alǵysty barsha áskeri qyzmetshilerge, Kúshtik qurylym qyzmetkerlerine kórsetilgen shynaiy qurmet dep baǵalady.
– Sizderdiń otanshyldyq rýhtaryńyz, eń aldymen, jas urpaq úshin jaqsy úlgi-ónege. Olar sizderge qarap boi túzeidi. Sizder eren eńbek pen naǵyz erlikti pash etip kelesizder. Joǵary memlekettik marapattar Otan aldyndaǵy qyzmetterińizge jańa jiger beredi dep senemin, – dedi Prezident.
Memleket basshysy barlyq áskeri qyzmetshiler men quqyq qorǵaý organdary qyzmetkerlerine Otan aldyndaǵy adal qyzmeti úshin alǵys aitty.
Saltanatty rásim barysynda Marat Qusaiynovqa, Rýslan Shpekbaevqa general-leitenant áskeri ataǵy; Aidar Aimurzinge, Rústem Aqbalinge, Nurlan Aldiiarovqa, Almaz Ahmadievke, Serik Borambaevqa, Mereke Kúshikbaevqa, Qýanyshbek Úshtaevqa general-maior áskeri ataǵy; Aibar Dýanbaevqa, Shyńǵys Qońqashevqa, Rýslan Seisembaevqa ulttyq qaýipsizdik general-maiory arnaýly ataǵy; Murat Baimuqashevqa, Ońal Bekievke, Aqynqali Dármenovke, Arystanǵani Zapparovqa, Nurlan Másimovke, Marat Tólebaevqa politsiia general-maiory arnaýly ataǵy; Janat Eshmaǵambetovke ádilet general-maiory arnaýly ataǵy; Qairat Ábdihanovqa, Jarqynbek Baqashbaevqa, Maqsat Qojabaevqa, Serik Shalabaevqa 3-synypty memlekettik ádilet keńesshisi synyptyq sheni; Nurlan Shabdarǵa 3-sanatty joǵary biliktilik synyby berildi.
Sonymen qatar is-shara barysynda I dárejeli «Dańq» ordenimen Memlekettik kúzet qyzmeti bastyǵynyń orynbasary Talǵat Muhtarov; II dárejeli «Dańq» ordenimen Ulttyq qaýipsizdik komitetiniń Qaraǵandy oblysy boiynsha departamentiniń bastyǵy Kendebai Adambekov, Sybailas jemqorlyqqa qarsy is-qimyl agenttigi tóraǵasynyń birinshi orynbasary Oljas Bektenov, Ulttyq ulan «Batys» óńirlik qolbasshylyǵynyń qolbasshysy Arman Jumaǵaliev nagradtaldy.
Budan bólek I dárejeli «Aibyn» ordeni Ulttyq qaýipsizdik komiteti departament bastyǵynyń orynbasary Ádiljan Alshynovqa, Qazaqstan Respýblikasy Qarýly Kúshteri Bas shtaby Injenerlik áskerler departamentiniń bastyǵy Nurlan Qonysovqa; II dárejeli «Aibyn» ordeni Ishki ister ministrligi Shyǵys Qazaqstan oblysynyń politsiia departamenti Óskemen qalasynyń politsiia basqarmasy patrýldik politsiia batalonynyń inspektory Nurjan Kákeevke, Bas prokýratýranyń departament bastyǵy Serik Káripbekovke, Qarjylyq monitoring agenttigi Tergeý departamentiniń basshysy Saiat Saýkombekovke, Tótenshe jaǵdailar ministrligi Órtke qarsy qyzmet komiteti tóraǵasynyń orynbasary Marat Hasenovke; III dárejeli «Aibyn» ordeni Memlekettik kúzet qyzmetiniń Airyqsha maqsattaǵy kúshteri «Batyr» prezidenttik polkiniń mamany Evgenii Pivenge tabystaldy.
Al Ishki ister ministrligi Jambyl oblysynyń politsiia departamenti Jergilikti politsiia qyzmeti basqarmasynyń aǵa inspektory Diliafrýz Kinjehanova «Qurmet» ordenimen marapattaldy.
Ishki ister ministrliginiń Kóliktegi politsiia departamenti Qyzylorda stantsiiasyndaǵy jelilik politsiia bóliminiń aǵa inspektory Darhan Ábdikárimov, Tótenshe jaǵdailar ministrligi Qostanai oblysy tótenshe jaǵdailar departamenti Órt sóndirý jáne avariialyq-qutqarý jumystary qyzmeti № 5 órt sóndirý bóliminiń bólimshe komandiri Vladimir Beliakov, Tótenshe jaǵdailar ministrligi Nur-Sultan qalasy tótenshe jaǵdailar departamenti Órt sóndirý jáne avariialyq-qutqarý jumystary qyzmeti № 6 mamandandyrylǵan órt sóndirý bóliminiń aǵa órt sóndirýshi-qutqarýshysy Aidarhan Kemaladinov, Ishki ister ministrligi Almaty oblysynyń politsiia departamenti Taldyqorǵan qalasynyń politsiia basqarmasy patrýldik politsiia rotasynyń inspektory Dáýren Nárikbaev, Ishki ister ministrliginiń Batys Qazaqstan oblysy boiynsha qylmystyq-atqarý júiesi departamenti RÝ-170/1 mekemesiniń baqylaýshysy Abylai Tóleev «Erligi úshin» medalimen nagradtaldy.
«Jaýyngerlik erligi úshin» medali Qorǵanys ministrliginiń 18404 áskeri bólimi desanttyq-shabýyldaýshy batalonynyń komandiri Jasulan Baibaraqovqa, Qorǵanys ministrligi 15632 áskeri bóliminiń komandiri Janat Bekturǵanovqa, Qazaqstan Respýblikasy Qarýly Kúshteri Bas shtabynyń departament bastyǵy Elnur Bisembaevqa, Qorǵanys ministrligi 14776 áskeri bóliminiń aǵa ofitseri Maksim Dobroselskiige, Qorǵanys ministrliginiń 21450 áskeri bólimi motoatqyshtar batalony rotasynyń tehnigi – aǵa mehanigi-júrgizýshisi Nurjan Jariiaqulǵa, Qorǵanys ministrliginiń 21814 áskeri bólimi zymyran-artilleriialyq kemesiniń (3-dárejeli) komandiri Baýyrǵali Imashevqa, Qazaqstan Respýblikasy Qarýly Kúshteri Áýe qorǵanys kúshteri qolbasshysynyń basqarmasy jaýyngerlik daiarlyq basqarmasynyń aǵa inspektory-ushqyshy – baǵyt aǵa ofitseri Erlan Qozǵulovqa, Ulttyq qaýipsizdik komitetiniń basqarma bastyǵy Shynarkúl Seidahmetovaǵa berildi.
