Qasym-Jomart Toqaev Qyrǵyzstanǵa resmi sapary aiasynda Sadyr Japarovpen birge «Jahandyq ózgerister dáýirindegi eýraziialyq ekonomikalyq integratsiia. Investitsiialyq belsendiliktiń jańa múmkindikteri» atty taqyrypta ótken Eýraziialyq ekonomikalyq forýmnyń plenarlyq otyrysyna onlain-formatta qatysty, dep habarlaidy "Ult aqparat" Aqordanyń baspasóz qyzmetine silteme jasap.
Qazaqstan men Qyrǵyzstan kóshbasshylarymen qatar jiynǵa Armeniianyń Premer-ministri Nikol Pashinian, Resei Prezidenti Vladimir Pýtin, sondai-aq Belarýs Premer-ministri Aleksandr Golovchenko men Eýraziialyq ekonomikalyq komissiia alqasynyń tóraǵasy Mihail Miasnikovich beinebailanys rejiminde qatysty. Bul is-sharany Resei ónerkásipshileri men kásipkerleri odaǵynyń prezidenti Aleksandr Shohin júrgizdi.
Is-sharaǵa qatysýshylar integratsiiany odan ári damytýdyń, Eýraziialyq ekonomikalyq odaq aiasynda energetika, ónerkásip, kólik, qarjy jáne tsifrlandyrý salalaryndaǵy yntymaqtastyqty nyǵaitýdyń perspektivalaryna qatysty oi-pikirlerin ortaǵa saldy.
Qasym-Jomart Toqaev óz sózin EEO keńistigindegi ózara saýda-sattyqty arttyrýdyń perspektivalaryna jáne Eýraziialyq ekonomikalyq komissiianyń jumysyn jetildirýge arnady.
Memleket basshysy Eýraziialyq ekonomikalyq odaqtyń integratsiialyq birigý úderisine qatysýshy memleketter arasyndaǵy erkin saýdany damytý maqsatynda tiisti jaǵdai jasaý úshin qurylǵanyn aitty.
– Eýraziialyq ekonomikalyq odaq kúrdeli geosaiasi jaǵdaida óziniń tiimdiligin kórsetti. Biz muny kórip otyrmyz. Eýropalyq odaqtaǵy jáne basqa da ekonomikalyq uiymdardaǵy siiaqty bul Odaqta túrli máseleler týyndap otyratynyna tań qalýǵa bolmaidy. Árbir memleket ulttyq múddesin ózdiginshe kózdeidi. Árbir memleket týyndaǵan máseleni ózderi durys dep sanaǵan pikiri boiynsha sheshilgenin qalaidy. Bul árbir halyqaralyq, ásirese saýdamen ainalysatyn uiymdarǵa tán jaǵdai, – dedi Qazaqstan Prezidenti.
Sonymen qatar Qasym-Jomart Toqaev Eýraziialyq ekonomikalyq komissiianyń qyzmeti jóninde de aitty. Onyń pikirinshe, Komissiia tabysty jumys istep jatyr.
– Búginge deiin Eýraziialyq ekonomikalyq komissiia aiasynda ótkizilgen konsýltatsiialar nátijesinde kedergilerdiń 80 paiyzy joiyldy. Bul kúrdeli jumys jalǵasyn tabady dep úmittenemiz. Integratsiia – kóp eńbek sińirýdi jáne múshe memleketter arasynda ymyraǵa kelýdi qajet etetin úderis. Qazaqstan Eýraziialyq ekonomikalyq komissiianyń naqty nátijege jai sózben emes, naqty ispen qol jetkizgenin qoldaidy. Kez kelgen máseleni iskerlikpen sheshken jón. Sebebi halyqtarymyz bul máselelerdiń uzaq sozylǵanyn kútpeidi, qazir sheshilgenin qalaidy. Olar máseleni sheshýdiń durys joly osy dep sanaidy, – dedi Memleket basshysy.
Qasym-Jomart Toqaevtyń aitýynsha, Qazaqstan eýraziialyq integratsiianyń iskerlik ári pragmatikalyq negizde damyǵanyn jaqtaidy.
