Memleket basshysy «BIZ BIRGEMIZ» jalpyulttyq onlain forýmyna qatysty, dep habarlaidy Aqordanyń baspasóz qyzmeti.
Prezident Qasym-Jomart Toqaev óz sózinde álemniń barlyq eli, onyń ishinde Qazaqstannyń da koronavirýs indetine qarsy kúresip jatqanyn aitty. Osyǵan orai, memleket tarapynan qolǵa alynǵan asa mańyzdy sharalar toqtaldy.
– Koronavirýspen kúresý úshin biýdjetten qomaqty qarajat bólindi. Turmysy tómen otbasylarǵa azyq-túlik taratyldy. Shaǵyn jáne orta biznes ókilderine birqatar jeńildik jasaldy. Elbasynyń bastamasymen qurylǵan «Birgemiz» qorynan da kólemdi qarjy bólinip, muqtaj jandarǵa naqty kómek berilip jatyr. Bul jumysty «Nur Otan» partiiasy belsendi túrde júzege asyrýda. Osynyń bári birligimizdiń bekemdigin kórsetedi, – dedi Memleket basshysy.
Forým barysynda Qasym-Jomart Toqaev indetten qaitys bolǵan azamattardyń týystary men jaqyndaryna kóńil aityp, virýs juqtyrǵandardyń tezirek saýyǵyp ketýine tilektestik bildirdi. Prezident halyqty osyndai qiyn-qystaý kezeńde zor jaýapkershilik tanytyp, ózderiniń, týystarynyń jáne jaqyndarynyń densaýlyqtaryna janashyrlyqpen qaraýǵa shaqyrdy. Memleket basshysy halqymyzdyń aýyzbirshilik, sabyrlyq, janashyrlyq sekildi dástúrli qundylyqtaryn atap ótip, meditsina jáne politsiia qyzmetkerlerine, áskeri jáne memlekettik qyzmetshilerge, volonterler men jýrnalisterge, sondai-aq, qaiyrymdylyq jasaǵan adamdarǵa rizashylyq bildirdi.
– Dárigerler, medbikeler, sanitarlar men jedel járdem qyzmetkerleri! Epidemiiamen kúreste eń aýyr jumys sizderge júkteldi. Sizder kún saiyn búkil elge erik-jigerdiń, qaisarlyqtyń, batyldyqtyń eren úlgisin kórsetip kelesizder. Biz budan naǵyz patriotizmdi kóremiz. Asa qiyn jaǵdailarda erlikke tán áreket jasaityndaryńyzdy bilemin. Pandemiianyń qaita órship, aýqymy keńeie túsken kezde sizder qorǵanys kiimderiniń, qajetti dári-dármekterdiń, naýqastarǵa arnalǵan oryndardyń jetispeýshiligi jáne basqa da qiyndyqtarmen betpe-bet kelip otyrsyzdar. Biz bul problemalardy jaqyn arada sheshemiz. Atalǵan jaǵdaidy shuǵyl retke keltirý úshin Úkimetke naqty tapsyrma berildi, – dedi Prezident.
Memleket basshysy Qazaqstandaǵy árbir 100 myń adamǵa shaqqanda 80-nen asa azamattyń dertke shaldyqqanyn jáne munyń álemdik statistika boiynsha ortasha kórsetkish ekenin aitty. Naýqastar sapaly em qabyldap jatyr. Bir top meditsina qyzmetkeri jankeshti eńbekteri úshin memlekettik orden-medaldarmen marapattaldy.
Sonymen qatar Qasym-Jomart Toqaev quqyq qorǵaý organdarynyń jumysyn da joǵary baǵalady.
– Qoǵamdaǵy turaqtylyq pen tynyshtyq politsiianyń minsiz qyzmetine bailanysty. Búginde karantin sharalarynyń saqtalýyn qadaǵalap, beketterde qyzmet etip kelesizder. Bul - ońai jumys emes. Tipti, qoǵam ókilderi tarapynan synǵa ushyraǵan kezderińiz de boldy. Degenmen tártip saqshylarynyń basym bóligi – adal qyzmet etip jatqan azamattar. Muny eshkim joqqa shyǵara almaidy, – dedi Prezident.
Memleket basshysynyń aitýynsha, Tótenshe jaǵdai rejimin toqtatqannan keiin azamattarymyz bosańsyp ketken, qaýip-qaterdi elemegen, meditsinalyq tártip pen eskertýlerdi saqtamaǵan, tipti, keibir adamdar mundai aýrý joq degen qaýesetke sengen. Sondyqtan Úkimet karantin sharalaryn qaita kúsheitti. Biraq bul kóńil-kúidi túsirip, saryýaiymǵa salynýǵa sebep emes. Qasym-Jomart Toqaev elimiz tolyqqandy, qalypty tirshiligin jalǵastyra berý kerek dep sanaidy.
– Búkil álemdegi adamdar karantin kezinde otbasylarymen aradaǵy qarym-qatynasty qalai bekite túskeni, balalaryna kóp kóńil bólip, olardyń problemalary men alańdaýshylyǵyna ýaqyt arnaǵany týraly óz tájiribelerimen bólisýde. Sýretshiler, mýzykanttar, aqyn-jazýshylar karantin ýaqytynda shyǵarmashylyqpen ónimdi ainalysqandaryn aitýda. Iaǵni, árbir qiyndyqtyń óz qaiyry bolady. Árbir daǵdarys jańa múmkindikterge jol ashady. Biz bul daǵdarysty birlese otyryp mindetti túrde jeńemiz, odan rýhymyzdy shyńdap, dúniege degen kózqarasymyzdy ózgertip shyǵamyz, – dedi Memleket basshysy.
«BIZ BIRGEMIZ» atty jalpyulttyq onlain forýmy aiasynda koronavirýsqa qarsy kúreste aldyńǵy shepte júrip, erlik kórsetken birqatar azamat Qazaqstan Prezidenti taǵaiyndaǵan «Halyq alǵysy» arnaýly medalimen marapattaldy. Sonymen qatar elordada pandemiiamen kúrestegi azamattarymyzdyń erligin máńgi este saqtaý úshin eskertkish ornatylady.
