Shyǵys Qazaqstan oblysyndaǵy joldardyń jaǵdaiy tikelei Memleket basshysynyń baqylaýynda bolady. Bul týraly búgin QR Prezidentiniń baspasóz hatshysy Berik Ýáli facebook-tegi paraqshasynda jazdy.
«Memleket basshysy Shyǵys Qazaqstan jáne Almaty oblystaryna sapary barysynda jergilikti avtojoldardyń sapasynyń syn kótermeitinin jáne Alakóldegi týristik servisti jaqsartý týraly aitqan edi. Osyǵan orai, Úkimetke jáne eki óńirdiń ákimderine qysqa merzimde keshendi sharalar uiymdastyrýǵa tapsyrma bergen bolatyn. Quzyrly mekemeler Prezidenttiń osy syndarynan qorytyndy shyǵarady dep oilaimyz. Bul Memleket basshysynyń tikelei baqylaýynda», - dep jazdy Berik Ýáli.
«Ótken jyly qazaqstandyqtar ózimizdiń Alakólde demalýdy jón kórgen edi. Alaida olar servistik qyzmet kórsetý salasynda aitarlyqtai problemalar bar ekendigin kórdi. Naqtyraq aitqanda munda qydyryp kelýshilerdiń jergilikti joldardyń sapasyna kóńili tolmady. Osy rette Almaty jáne Shyǵys Qazaqstan oblysy ákimderiniń basty mindetteri joldy jóndeý jáne onymen bailanysty salalardyń jumysyn retke keltirý bolyp tabylady», - dedi QR Prezidenti.
Sondai-aq memleket basshysy oblystyń týristerdiń eń kóp qatynaityn jerleriniń birine ainalǵandyǵyn atap ótti. Bul rette QR Prezidenti óziniń shipaly sýymen tanymal Alakól kóliniń orny erekshe ekendigin atap ótti.
«Tek ótken jyldyń ózinde ǵana óńirge kelýshi týrister sany 20 paiyzǵa artyp, 2 mln adamdy qurady. Bul óte jaqsy kórsetkish. Alaida munda kólik, tipti qonaq úi infraqurylymy da aitarlyqtai jetildirýdi qajet etedi. Ásirese týrister júretin joldardyń jaǵdaiyna erekshe kóńil bólý qajet. Bul máselelerdi men Shyǵys Qazaqstan oblysyna jasaǵan saparymda da aittym. Osy oraida men Úkimetke ákimdikpen birlese otyryp, kýrort aimaǵynyń infraqurylymyn damytý boiynsha keshendi sharalardy qolǵa alýdy tapsyramyn», - dedi Qasym-Jomart Toqaev.
.jpeg)