Foto: QR Mádeniet jáne aqparat ministrligi
Astanada Qazaqstannyń eńbek sińirgen qairatkeri, QR Memlekettik syilyǵy jáne «Qurmet», «Otan» ordenderiniń iegeri Aqushtap Baqtygereevanyń 80 jyldyq mereitoiyna arnalǵan is-shara ótti, dep habarlaidy Ult.kz.
Oǵan QR Parlamenti Senatynyń tóraǵasy Máýlen Áshimbaev, QR Parlamenti Májilisiniń tóaǵasy Erlan Qoshanov, QR Mádeniet jáne aqparat ministri Aida Balaeva qatysty.
Is-sharada Aida Balaeva Prezident Qasym-Jomart Toqaevtyń quttyqtaý hatyn oqyp berdi.
«Halqymyz ózińizdi mádenietimiz ben ónerimizdi órkendetýge úles qosyp kele jatqan qarymdy qalamger, kórnekti qoǵam qairatkeri retinde jaqsy biledi jáne qurmetteidi. Eńbek jolynda birqatar otandyq gazet-jýrnaldar men baspada jemisti jumys jasap, ulttyq ádebietimizdiń ilgeri basýyna kúsh-qairatyńyzdy jumsadyńyz. Qazaq poeziiasyna ózindik órnegińizben kelip, aishyqty oilar men airyqsha dara shýmaqtaryńyzben tanyldyńyz. Elimizdiń mártebesin asqaqtatqan Táýelsizdik pen beibit ómirdi jáne tabiǵat sulýlyǵyn arqaý etken jalyndy jyrlaryńyzdy talǵamy biik oqyrman jyly qabyl aldy. Sonymen qatar, otbasy qundylyqtary, qyz balanyń tárbiesi, ananyń qoǵamdaǵy róli týraly paiymdy pikirlerińiz qoldaý taýyp keledi. Aldaǵy ýaqytta el-jurttyń ortasynda syi-qurmetke bólenip, shyǵarmashylyq izdenisterińiz tabysty bola berýine tilektespin. Sizge myqty densaýlyq jáne otbasyńyzǵa baq-bereke tileimin!», – delingen quttyqtaý hatta.
Foto: QR Mádeniet jáne aqparat ministrligi
Óz sózinde Aida Balaeva aqyndy mereili jasymen quttyqtap, qalamger shyǵarmashylyǵynyń urpaq tárbiesi, jastardyń boiyna rýhani qundylyqtardy sińirýge zor úles qosqanyn atap ótti.
«Prezident atap ótkendei, qazaq ádebietinde Aqushtap Baqtygereevanyń ózindik órnegi, oryny bólek. Sebebi aqyn apamyzdyń óleńderi ár qazaqtyń júregine jaqyn. Onyń poeziiasy erekshe syrshyldyqpen, sezimtaldyqpen órilgen. Qalamgerdiń qazaq áieliniń beinesin asqaqtatqan biregei týyndylaryn erekshe atap ótkim keledi. El anasy, ult tárbiesiniń janashyry retinde qundylyqtarymyzdy qasterleýge, qazaq qyzdaryna parasat pen tárbie nárin sińirýge zor úles qosyp keledi», – dedi A. Balaeva.
Foto: QR Mádeniet jáne aqparat ministrligi
Sondai-aq, ministr mereitoiǵa orai túrli is-sharalar, ádebi keshter uiymdastyrylyp jatqanyn aitty.
Atap aitsaq, keshe aqyn mereitoiyna orai Qazaq ulttyq óner ýniversitetinde ádebi-sazdy keshi bolyp ótti.
Al, búgin Q.Qýanyshbaev atyndaǵy qazaq ulttyq-mýzykalyq teatrynda Batys Qazaqstan oblystyq Hadisha Bókeeva atyndaǵy qazaq drama teatry Aqushtap Baqtygereeva men dramatýrg Mádina Omarovanyń stsenariimen ázirlengen «Juban» poetikalyq dramasy sahnalandy.
Foto: QR Mádeniet jáne aqparat ministrligi
QR Ulttyq akademiialyq kitaphanasynda «Alashtyń Aqushtaby» atty ádebi kezdesý ótkizildi. Kezdesýde aqynnyń «Meniń Farizam» atty jańa kitabynyń tusaýkeseri ótkizildi. Aqyn bul kitabynda qazaq áielderi arasynan shyqqan biregei qalamger Fariza Ońǵarsynovanyń ómir joly týraly syr shertedi.
Sonymen qatar, L. Gýmilev atyndaǵy Eýraziia Ulttyq ýniversitetinde Aqushtap Baqtygereevanyń oqyrmandarmen kezdesýi uiymdastyryldy.
