Foto: Aqorda
Memleket basshysy Qasym-Jomart Toqaev Qosshy qalasyndaǵy mektep-gimnaziiamen tanysty. Prezident ujymǵa sáttilik tilep, mektepke óziniń "Áke týraly oi-tolǵaý" kitabyn jáne Qazaqstanda shyǵarylǵan avtobýs syiǵa tartty, dep habarlaidy Aqorda.
Prezident Qasym-Jomart Toqaevtyń Aqmola óńirine jumys sapary Qosshy qalasyndaǵy 1500 oryndyq mektep-gimnaziiany aralap kórýden bastaldy.
Qosshy qalasynyń jańa aýdanynda ornalasqan mektep "Bolat Ótemuratov qorynyń" jeke investitsiiasy esebinen salynyp, jergilikti bilim bóliminiń basqarýyna berilgen.
"Jaily mektep" ulttyq jobasynyń standarttaryna sai boi kótergen bilim oshaǵynda qazirgi kezde eki aýysymmen 2700 bala oqidy. Mektepte 280 oryndyq akt zaly, 360 oryndyq ashana, 2 sport zaly, informatika, himiia, fizika, biologiia, tehnologiia jáne mýzyka kabinetteri bar.
Mektep direktory Didar Asqarovanyń aitýynsha, oqýshylar tek bilim alyp qana qoimai, "Birtutas tárbie baǵdarlamasy" aiasynda sport sektsiialaryna jáne shahmat, toǵyzqumalaq, asyq atý, bi, hor, fortepiano, dombyra sekildi úiirmelerge tegin qatysa alady.
Memleket basshysy robotty tehnika, mobilografiia, avtomobil júrgizýdi virtýaldy úirený, shet tili kabinetterin, mektep kitaphanasyn aralap kórip, ustazdarmen jáne oqýshylarmen áńgimelesti.
"Qazaqstannyń ozyq memleketke ainalǵanyn qalasaq, osyndai robotty tehnika siiaqty baǵyttardy úirený kerek. Bul – óte qajet. Balalarymyz árqashan bilimdi bolsyn", – dedi Qasym-Jomart Toqaev.
Prezident ujymǵa sáttilik tilep, mektepke óziniń "Áke týraly oi-tolǵaý" kitabyn jáne Qazaqstanda shyǵarylǵan avtobýs syiǵa tartty.
