Dóńgelek ústel formatynda ótken kezdesý barysynda álemdik ekonomikadaǵy, saýdadaǵy jáne saiasattaǵy jahandyq úrdister talqylandy. Baiandamalarda Qazaqstan men Ortalyq Aziiany damytýdyń perspektivalaryna jáne «Bir beldeý, bir jol» bastamasyn júzege asyrýǵa erekshe kóńil bólindi, dep habarlaidy "Ult aqparat" Aqordaǵa silteme jasap.
AQSh-tyń Federaldy rezervi tóraǵasynyń burynǵy orynbasary, Izrail Ortalyq bankiniń eks-basshysy Stenli Fisher álemdik ekonomikadaǵy ahýalǵa óz pikirin bildirdi. Ol qazirgi jaǵdaida turaqty ekonomikalyq ósimdi qamtamasyz ete alatyn monetarlyq saiasattyń negizgi faktorlaryna egjei-tegjeili toqtaldy. Sarapshy kez kelgen baǵytta tabysqa qol jetkizý úshin bilimniń mańyzdy ról atqaratynyn aitty.
Oksford ýniversitetiniń professory Piter Frankopan Ortalyq Aziiadaǵy jáne Eýraziialyq keńistiktegi integratsiialyq úderisterge, sondai-aq, «Bir beldeý, bir jol» jobasyn júzege asyrý jónindegi Qytai bastamasyna qatysty óz pikirin aitty.
Kolýmbiianyń burynǵy prezidenti, álemdik Nobel syilyǵynyń laýreaty Hýan Manýel Santos Kalderon barlyq shielenisti jaǵdailarda beibit dialogtyń mańyzdy ekenin atap ótip, Venesýeladaǵy qazirgi saiasi turaqsyzdyqtyń Latyn Amerikasy elderiniń jáne jalpy álem ekonomikasy úshin qaýip tóndiretinin aitty.
Pikirtalasqa Básekege qabilettilik ortalyǵy IMD direktory Artýro Bris, Beijiń ýniversiteti, Jańa qurylymdyq ekonomika institýtynyń dekany Djastin Ifý Lin, The Other Canon Foundation saraptamalyq ortalyǵynyń negizin qalaýshy Erik Rainert, «Nokia Corporation» kompaniiasy direktorlar keńesiniń tóraǵasy Risto Siilasmaa, The Boston Consulting Group tóraǵasy Hans-Pol Biýrkner qatysty.
Qazaqstan Prezidenti Qasym-Jomart Toqaev Elbasy Nursultan Nazarbaevtyń basshylyǵymen Qazaqstan keiingi jyldary belgili bir deńgeide damyǵanyn jáne elimizdiń óz qarqynyn odan ári ilgerilete beretinin atap ótti.
– Qazaqstan biik maqsattary men strategiialyq josparlary bar jahandyq trendter aiqyndalatyn jańa dáýirge qadam basty. Olardyń tabysty júzege asyrylýy elimizdiń damýyna mańyzdy úles qosýy tiis. Biz búginde barlyq kórshilerimizben, strategiialyq áriptesterimizben yntymaqtastyq ornatýǵa ashyqpyz. Qazaqstan aldaǵy ýaqytta da óziniń damý josparyn júzege asyrý úshin úzdik halyqaralyq tájiribelerdi eskeretin bolady. Biz úshin halyqtyń ál-aýqatyn arttyrý, bilim jáne densaýlyq salalaryn damytý basym baǵyt sanalady, – dedi Memleket basshysy.
Kezdesý sońynda Qasym-Jomart Toqaev dóńgelek ústel jumysyna qatysqandarǵa mazmundy dialogy jáne qundy keńesteri úshin rizashylyǵyn bildirdi.
