Úkimet birneshe óńirdegi aýylda «alqaptan sórege deiin» kooperatsiialyq tizbekti damytý boiynsha ilki jobany iske qosýy tiis. Bul týraly Tótenshe jaǵdai rejimin qamtamasyz etý jónindegi memlekettik komissiianyń qorytyndy otyrysynda Memleket basshysy Qasym-Jomart Toqaev aitty, dep habarlaidy QazAqparat.
«Qazirgi ahýal belgili shyndyqty naqty qýattap berdi: azyq-túlik qaýipsizdigi - tolyqtai alǵanda memleket qaýipsizdiginiń basty elementi. Sondyqtan biz sharýalarǵa barynsha qoldaý kórsetýdi jalǵastyramyz. Qazirdiń ózinde júzege asyrylyp jatqan forardtyq satyp alýlarǵa qosymsha offteik-kelisimsharttar engizý jáne «QazAgro» kreditteri boiynsha bereshekterdi qaita qurylymdaý joly arqyly qarjylandyrý tetigi keńeitiledi», - dedi Memleket basshysy.
QR Prezidentiniń dereginshe, elimizde shamamen 1 mln 700 myń jeke qosalqy sharýashylyq bar. Degenmen olardyń ónimderi saýda nysandary arqyly resmi saýdalanbaidy jáne qaita óńdeý kásiporyndaryna jetkizilmeidi. Memleket olardan salyq ta almaidy. Al mundai sharýashylyqpen ainalysatyndar áleýmettik jaǵynan da qorǵalmaǵan.
«Úkimetke «Atameken» UKP-men birlesip, birneshe óńirdegi aýylda «alqaptan sórege deiin» kooperatsiialyq tizbekti damytý boiynsha ilki jobany iske qosýdy tapsyramyn. Keiinirek, jobany masshtabtaýǵa jáne 2021 jyldyń ortasyna qarai tolyqqandy baǵdarlama ázirleýge bolady. Bul baǵdarlamany júzege asyrý barysynda «Damý» qorynyń kepildik berý quralyn paidalaný arqyly «QazAgro» jelisi arqyly jyldyq mólsherlemesi 6 paiyzpen jeńildetilgen mikrokreditti qoldanylady», - dedi Qasym-Jomart Toqaev.
Memleket basshysynyń atap ótýinshe, turaqty satyp alý jáne satý, qatysýshylardyń agrarlyq quziretin arttyrý jáne oqytý júiesin de jolǵa qoiý qajettigin basa aitty.
«Munyń barlyǵy shamamen 2 mln aýyl turǵynynyń tabysyn arttyryp, otandyq aýyl sharýashylyǵy kásiporyndarynyń júktemesin 53-ten 70 paiyzǵa deiin ulǵaitady jáne áleýmettik mamńyzy bar ónimder importyn tómendetedi», - dedi QR Prezidenti.
