Jetisaida toi ústinde ýaǵyz aityp, erler men áielderdi bólek otyrǵyzýdy talap etken 66 jastaǵy qariianyń qyzy Prezidentke beineúndeý joldady, dep habarlaidy ult.kz.
Onyń aitýynsha, ákesi radikaldy kózqarastaǵy adam emes. Qyzdyń sózinshe, jabyq otbasylyq toida túsirilgen videony ánshi Roza Álqoja ruqsatsyz jariialaǵan.
Qariianyń qyzy ákesiniń densaýlyǵy nashar ekenin de aitty. Onyń sózinshe, buǵan deiin jol apatyna túsip, basyna ota jasatqan. Sonymen qatar sońǵy ýaqytta birneshe jaqynynan aiyrylyp, bul jaǵdai onyń psihologiialyq jaǵdaiyna aýyr áser etken.
«Ákeme keshirimmen qaraýdy suraimyn», – degen ol Memleket basshysynan istiń mán-jaiyn jan-jaqty qarap, ádil sheshim qabyldaýdy ótindi.
Eske salaiyq, tamyz aiynyń basynda Jetisaida toida sóz sóilegen 66 jastaǵy er adam óner adamdaryna qatysty syn aityp, erler men áielderdiń bólek otyrýyn talap etken. Keiin oǵan dini alaýyzdyq qozdyrdy degen aiyp taǵylyp, qamaýǵa alynǵany habarlanǵan.
