Memleket basshysynyń tapsyrmasy boiynsha óńirlerdegi epidemiologiialyq jaǵdaidy tekserý úshin Premer-Ministrdiń orynbasary Eraly Toǵjanov jumys saparymen Mańǵystaý oblysyna bardy. Bul týraly primeminister.kz caity habarlady.
Sapar barysynda oblystaǵy birqatar meditsinalyq mekemelerdi aralap, óńirdegi meditsina qyzmetkerlerimen kezdesý ótkizdi, sondai-aq «SQ-Farmatsiia» JShS qoimalarynda dári-dármekter qorynyń bolýyn tekserdi.
«SQ-Farmatsiia» JShS qoimalaryn tekserý kezinde KVI men pnevmoniiany emdeý úshin qajetti dári-dármekterdiń eki túri - deksametazon jáne prednizolon dárileri boiynsha bir ailyq qorynyń tapshylyǵy anyqtaldy. Osy máseleni sheshý úshin «SQ-Farmatsiia» JShS-yna Mańǵystaý oblysynyń ákimdigimen birlesip meditsinalyq mekemelerge tielgen dári-dármekterge aýdit júrgizý, sondai-aq qysqa merzim ishinde dárilik zattardyń qajetti qoryn qamtamasyz etý tapsyryldy.
Úkimettik delegatsiia sonymen qatar Aqtaýdaǵy qonaq úilerdiń birinde meditsina qyzmetkerleriniń turý jaǵdailarymen tanysty. Búgingi tańda qonaq úide mamandar ornalastyrylǵan, onyń ishinde basqa óńirlerden issaparǵa jiberilgen 11 áskeri dáriger bar.
Kezdesý barysynda meditsina qyzmetkerleri turý jáne jumys isteý jaǵdailary, sondai-aq óńirde engizilgen karantin sharalarynyń arqasynda aýrýhanalarda júktemeniń turaqty azaiǵany týraly aityp berdi. Premer-Ministrdiń orynbasary pandemiia kezindegi aldyńǵy sheptegi eren eńbegi úshin meditsina qyzmetkerlerine alǵys bildirdi.
Aita keteiik, COVID-19-ben kúresý úshin óńirge 47 maman tartyldy. Dárigerler eki aýysymda jumys isteidi jáne karantin sharalary aiasynda 15 qonaq úide oqshaýlanyp turyp jatyr, olar barlyq qajetti zattarmen, onyń ishinde jeke qorǵanysh quraldarymen qamtamasyz etilgen.
Buǵan deiin E. Toǵjanov Qyzylorda oblysyna baryp, onda shuǵyl keńes ótkizgen edi jáne oblystyq birqatar meditsina mekemeleri men dárihanalardy aralady.
