Koronavirýs indetinen qaitys bolǵandardy jasyryp qalý múmkin emes. Bul týraly QR Premer-Ministriniń orynbasary Eraly Toǵjanov aitty, dep habarlaidy "Ult aqparat".
«Búginde eshkim eshteńeni jasyraiyn dep otyrǵan joq. Ásirese, qaiǵyly jaǵdaiǵa aparatyn dúnieniń bárin jasyrý múmkin emes qoi. Sondyqtan onyń bári qaralady, baǵa beriledi. Bul - bir. Ekinshiden, osy epidemiologiialyq ahýalǵa, koronavirýsqa bailanysty ár oblystyń jaǵdaiy kúnde tańerteńgi 9-00-de shtabta arnaiy qaralady. Onyń ishinde oblystaǵy jaǵdai, sol oblystaǵy aýdan ne bolmasa iri kompaniiadaǵy jaǵdai qaralýy múmkin», - dedi Eraly Toǵjanov Ortalyq kommýnikatsiialar qyzmetindegi brifing barysynda.
Onyń atap ótýinshe, búgin máselen, Atyraý oblysy arnaiy qaralǵan. Óitkeni bul oblysta bir táýlikte 371 adam koronavirýs juqtyrǵan. Bul Qazaqstan óńirleri ishindegi eń joǵary kórsetkishterdiń biri sanalady.
«Soǵan bailanysty 5 aýdandaǵy, onyń ishinde TShO siiaqty kompaniiadaǵy jaǵdai tereń taldanyp, elge jetkizilip otyr. Sondyqtan bir de bir jaǵdaidy jasyryp qalý múmkin emes. Onyń eshkimge qajeti de joq. Memleket ashyq qarap, elge jetkizedi. Ol halyq úshin, eldiń bolashaǵy úshin kerek», - dedi Eraly Toǵjanov.
Aita keteiik, brifing barysynda BAQ ókilderi nelikten KVI-den qaitys bolǵandar statistikasy bir aptadaǵy derekter boiynsha jariia etiletinin suraǵan bolatyn.
