Premer-ministrdiń orynbasary Eraly Toǵjanov Ashyq qosymshasy arqyly anyqtalatyn tártip buzýshylarǵa eskertý jasady, dep habarlaidy Sputnik Qazaqstan.
Ol Ashyq jobasy óz tiimdiligin kórsetkenin atap ótti. Qosymshanyń arqasynda pandemiia kezinde 9 myńnan astam kásipkerlik nysany ashylyp, jumysy istep jatyr.
"Respýblika boiynsha 4 millionnan astam qoldanýshy tirkeldi. Alaida osy joba keibir adamdardyń óz statýsyn bile tura, sanitarlyq talaptardy saqtamai júrgenin kórsetti. Sáýir aiynan beri Ashyq arqyly 9,6 myńnan astam adamnyń karantin rejimin buzǵany anyqtaldy. Olardyń jartysy - PTR-testi oń nátije kórsetkender. Dál osy adamdardyń toby halyqtyń densaýlyǵy men ómirine qaýip tóndirip otyr ", - dedi Eraly Toǵjanov ortalyq kommýnikatsiialar qyzmetinde ótken onlain brifingte.
Osy oraida úkimet basshysynyń orynbasary Ashyq qosymshasy arqyly anyqtalǵan tártip buzýshylarǵa aiyppul salynatynyn eske saldy. Zań boiynsha onyń kólemi 30 AEK – 87 510 teńgeni quraidy.
"Búginde 19 adamǵa qatysty ákimshilik hattama rásimdeldi. Olardyń ishinde 5 adamǵa aiyppul salyndy. Osy jumys jalǵasa beredi. Barlyq tártip buzýshy ákimshilik jaýapkershilikke tartylady", - dep atap kórsetti Toǵjanov.
Premer-ministrdiń orynbasary koronavirýs juqtyrǵan jáne naýqaspen bailanysta bolǵan adamdardyń úiden shyqpaýǵa mindetti ekenin erekshe atap ótti.
