پرەمەر-مينيستردٸڭ ورىنباسارى ەرالى توعجانوۆ Ashyq قوسىمشاسى ارقىلى انىقتالاتىن تەرتٸپ بۇزۋشىلارعا ەسكەرتۋ جاسادى, دەپ حابارلايدى Sputnik قازاقستان.
ول Ashyq جوباسى ٶز تيٸمدٸلٸگٸن كٶرسەتكەنٸن اتاپ ٶتتٸ. قوسىمشانىڭ ارقاسىندا پاندەمييا كەزٸندە 9 مىڭنان استام كەسٸپكەرلٸك نىسانى اشىلىپ, جۇمىسى ٸستەپ جاتىر.
"رەسپۋبليكا بويىنشا 4 ميلليوننان استام قولدانۋشى تٸركەلدٸ. الايدا وسى جوبا كەيبٸر ادامداردىڭ ٶز ستاتۋسىن بٸلە تۇرا, سانيتارلىق تالاپتاردى ساقتاماي جٷرگەنٸن كٶرسەتتٸ. سەۋٸر ايىنان بەرٸ Ashyq ارقىلى 9,6 مىڭنان استام ادامنىڭ كارانتين رەجيمٸن بۇزعانى انىقتالدى. ولاردىڭ جارتىسى - پتر-تەستٸ وڭ نەتيجە كٶرسەتكەندەر. دەل وسى ادامداردىڭ توبى حالىقتىڭ دەنساۋلىعى مەن ٶمٸرٸنە قاۋٸپ تٶندٸرٸپ وتىر ", - دەدٸ ەرالى توعجانوۆ ورتالىق كوممۋنيكاتسييالار قىزمەتٸندە ٶتكەن ونلاين بريفينگتە.
وسى ورايدا ٷكٸمەت باسشىسىنىڭ ورىنباسارى Ashyq قوسىمشاسى ارقىلى انىقتالعان تەرتٸپ بۇزۋشىلارعا ايىپپۇل سالىناتىنىن ەسكە سالدى. زاڭ بويىنشا ونىڭ كٶلەمٸ 30 اەك – 87 510 تەڭگەنٸ قۇرايدى.
"بٷگٸندە 19 ادامعا قاتىستى ەكٸمشٸلٸك حاتتاما رەسٸمدەلدٸ. ولاردىڭ ٸشٸندە 5 ادامعا ايىپپۇل سالىندى. وسى جۇمىس جالعاسا بەرەدٸ. بارلىق تەرتٸپ بۇزۋشى ەكٸمشٸلٸك جاۋاپكەرشٸلٸككە تارتىلادى", - دەپ اتاپ كٶرسەتتٸ توعجانوۆ.
پرەمەر-مينيستردٸڭ ورىنباسارى كوروناۆيرۋس جۇقتىرعان جەنە ناۋقاسپەن بايلانىستا بولعان ادامداردىڭ ٷيدەن شىقپاۋعا مٸندەتتٸ ەكەنٸن ەرەكشە اتاپ ٶتتٸ.
