1 qyrkúiekke deiin elimizdegi barlyq mektep pen balabaqsha beinebaqylaý kameralarymen qamtamasyz etilýi tiis. Bul týraly QR Premer-Ministriniń orynbasary Eraly Toǵjanov aitty, dep habarlaidy QazAqparat.
«Mektep júiesinde áli kúnge deiin 237 problemaly mektep bar. Sonaý 2017 jyly-aq bilim berý memlekettik baǵdarlamasy aiasynda olardyń barlyǵy joiylýy tiis edi. Jańa memlekettik baǵdarlamada 800 jańa mekteptiń qurylysy josparlanǵan. Apatty jaǵdaida balalar bilim alyp jatqan kezde mektep sapasyna, standartyna qatysty másele týyndaidy. Mundai mektepterdiń basym bóligi Batys Qazaqstan oblysynda 12, al Túrkistan oblysynda 7 jáne Atyraý men Jambyl oblystarynda 5-ten qalyp otyr. Barlyq ákimdikterge shuǵyl arada apattyq, úsh aýysymdy mektepterdi joiý boiynsha naqty sheshim qabyldaýdy, qabyldanǵan sharalar týraly baiandaýdy tapsyramyn. Bul másele meniń jeke baqylaýymda bolady. Keshe ǵana barlyq óńirlerge tapsyrma berdim. Mektepterde jóndeý jumystary júrgizilip jatqan óńirler de bar», - dedi Eraly Toǵjanov pedagogtar men bilim jáne ǵylym salasy qyzmetkerleriniń respýblikalyq tamyz keńesi barysynda.
Sonymen qatar ol bilim mazmuny men sapasyna qatysty da óte ózekti másele qalyp otyrǵandyǵyn aitty. Máselen, 2018 jyly PISA nátijesi barlyq kórsetkishter boiynsha Qazaqstannyń TMD elderinen qalyp qoiǵandyǵyn kórsetken. Sonymen qatar Premer-Ministrdiń orynbasary aýyl men qala mektepteri arasyndaǵy bilim alshaqtyǵyn joiý qajettigine basa nazar aýdartty.
«Taǵy bir mańyzdy másele - mektepte balalardyń qaýipsiz bolýy. 2 200 mektepte dárethana dalada ornalasqan. Mektepterdi jyly sanitarlyq jelimen qamtamasyz etý máselesin shuǵyl sheshý qajet. Buǵan qosa, 1 qyrkúiekke deiin mektepter men balabaqshalar beinebaqylaý kameralarymen qamtamasyz etilýi tiis. Oblys ortalyqtary men qalalalardaǵy mektepter mamandandyrylǵan kúzetke kóshýi qajet», - dedi Eraly Toǵjanov.
