Qostanaidyń «Tobyl» komandasy biyl fýtboldan Qazaqstan sýperkýbogynyń iegeri atandy, dep habarlaidy QazAqparat.
Sýperkýbokti ótken maýsymnyń chempiony - qostanailyq «Tobyl» men kýbok iegeri - almatylyq «Qairat» sarapqa saldy.
Kezdesý barysynda qos komanda alǵa qarai umtyldy. Osyndai sáttiń birinde almatylyq komanda qorǵaýshylary ózderiniń aiyp alańynda qarsylasty shalyp shyqty. Bas tóreshi Daniiar Sahi on bir metrlik núkteni kórsetti. Qostanailyq Serikjan Mýjikov penaltiden múlt ketken joq. Birinshi kezeńniń sońyna taman almatylyq klýbtan Joao Paolonyń alystan tepken doby qaqpa torynda týlap jatty.
Ekinshi kezeńde eki komanda taǵy bir gol soǵý múmkindigin izdedi. 62-minýtta «Tobyl» qaqpasyna belgilengen penaltidi «Qairat» fýtbolshysy Rikardý Alvesh nysanaǵa týra baǵyttai alǵan joq. Esesine 83-minýtta qostanailyq fýtbolshy Aibar Jaqsylyqov jeńis golyn soǵyp ketti.
Osylaisha «Tobyl» qarsylasynan 2:1 esebimen basym tústi. Qostanailyq klýb ekinshi jyl qatarynan sýperkýbok iegeri atandy.
Eske salsaq, biyl el birinshiligi 5 naýryzda jalaýyn kóteredi. Alǵashqy týrda 5 naýryzda «Kaspii» (Aqtaý) men «Qyzyljar», «Turan» (Túrkistan) men «Taraz», «Atyraý» men «Aqsý» (Pavlodar oblysy), «Astana» (Nur-Sultan) men «Shahter» (Qaraǵandy), «Ordabasy» (Shymkent) men «Maqtaaral» (Túrkistan oblysy) komandalary kezdesedi.
