قوستانايدىڭ «توبىل» كومانداسى بيىل فۋتبولدان قازاقستان سۋپەركۋبوگىنىڭ يەگەرٸ اتاندى, دەپ حابارلايدى قازاقپارات.
سۋپەركۋبوكتٸ ٶتكەن ماۋسىمنىڭ چەمپيونى - قوستانايلىق «توبىل» مەن كۋبوك يەگەرٸ - الماتىلىق «قايرات» ساراپقا سالدى.
كەزدەسۋ بارىسىندا قوس كوماندا العا قاراي ۇمتىلدى. وسىنداي سەتتٸڭ بٸرٸندە الماتىلىق كوماندا قورعاۋشىلارى ٶزدەرٸنٸڭ ايىپ الاڭىندا قارسىلاستى شالىپ شىقتى. باس تٶرەشٸ دانييار ساحي ون بٸر مەترلٸك نٷكتەنٸ كٶرسەتتٸ. قوستانايلىق سەرٸكجان مۋجيكوۆ پەنالتيدەن مٷلت كەتكەن جوق. بٸرٸنشٸ كەزەڭنٸڭ سوڭىنا تامان الماتىلىق كلۋبتان جواو پاولونىڭ الىستان تەپكەن دوبى قاقپا تورىندا تۋلاپ جاتتى.
ەكٸنشٸ كەزەڭدە ەكٸ كوماندا تاعى بٸر گول سوعۋ مٷمكٸندٸگٸن ٸزدەدٸ. 62-مينۋتتا «توبىل» قاقپاسىنا بەلگٸلەنگەن پەنالتيدٸ «قايرات» فۋتبولشىسى ريكاردۋ الۆەش نىساناعا تۋرا باعىتتاي العان جوق. ەسەسٸنە 83-مينۋتتا قوستانايلىق فۋتبولشى ايبار جاقسىلىقوۆ جەڭٸس گولىن سوعىپ كەتتٸ.
وسىلايشا «توبىل» قارسىلاسىنان 2:1 ەسەبٸمەن باسىم تٷستٸ. قوستانايلىق كلۋب ەكٸنشٸ جىل قاتارىنان سۋپەركۋبوك يەگەرٸ اتاندى.
ەسكە سالساق, بيىل ەل بٸرٸنشٸلٸگٸ 5 ناۋرىزدا جالاۋىن كٶتەرەدٸ. العاشقى تۋردا 5 ناۋرىزدا «كاسپيي» (اقتاۋ) مەن «قىزىلجار», «تۇران» (تٷركٸستان) مەن «تاراز», «اتىراۋ» مەن «اقسۋ» (پاۆلودار وبلىسى), «استانا» (نۇر-سۇلتان) مەن «شاحتەر» (قاراعاندى), «ورداباسى» (شىمكەنت) مەن «ماقتاارال» (تٷركٸستان وبلىسى) كوماندالارى كەزدەسەدٸ.
