QR Premer-Ministri Asqar Mamin beinekonferentsiia bailanysy rejiminde Táýelsiz Memleketter Dostastyǵynyń (TMD) Úkimet basshylary keńesiniń (ÚBK) otyrysyna qatysty. Bul týraly primeminister.kz saity habarlady.
«Bizge pandemiia saldaryn barynsha azaitý jáne jańa ekonomikalyq shynaiylyqtarǵa daiyndyq úshin ózara is-qimyl núktelerin birlesip izdeýdi jalǵastyrý qajet», — dedi A. Mamin.
Qazaqstan Úkimetiniń basshysy pandemiianyń saldaryn azaitý jónindegi sharalardy qosa alǵanda, TMD-nyń 2030 jylǵa deiingi kezeńge arnalǵan Ekonomikalyq damý strategiiasyn tiimdi iske asyrýdy qamtamasyz etý qajettigin atap ótti.
QR Premer-Ministri Qazaqstanda qurylyp jatqan Ulttyq taýar ótkizý júiesiniń modelin keńeitýdi jáne TMD-nyń Taýar ótkizý júiesin qalyptastyrýdy usyndy.
«Elderimiz arasynda AÓK ónimderiniń úzdiksiz aǵynyn qamtamasyz etý – azyq-túlik qaýipsizdigin jáne qoǵamdaǵy áleýmettik-ekonomikalyq turaqtylyqty qamtamasyz etýdiń negizgi faktory», — dedi A. Mamin.
Úkimet basshysy TMD-ǵa qatysýshy elderdiń birlesken týristik jobalardy iske asyrý bastamasyn kóterdi. Mysal retinde Qazaqstan men Ózbekstannyń «Uly Jibek joly» transshekaralyq týristik ónimin qurý jónindegi jumysy keltirildi. Bul rette elder vizalyq rejimderdi úndestirýdi jáne «Túrkistan – Shymkent – Tashkent – Samarqand – Buhara – Hiýa» joǵary jyldamdyqty temirjol qatynasyn uiymdastyrýdy josparlap otyr.
QR premeri TMD aiasynda «jasyl» tehnologiialardy damytý jáne engizý boiynsha birlesken is-qimyl josparyn ázirleýdi usyndy.
«Qorshaǵan ortany qorǵaý jónindegi kelisilgen jumys ekonomikalarymyzdyń turaqty damýy jáne uzaq merzimdi perspektivada halyqtyń turmys sapasyn arttyrý úshin qosymsha jaǵdailar jasaýǵa jol ashady», — dedi A. Mamin.
Otyrysqa Ázerbaijan Premer-Ministri Ali Asadov, Belarýs Premer-Ministri Roman Golovchenko, Qyrǵyzstan Premer-Ministri Sadyr Japarov, Moldova Premer-Ministri Ion Kiký, Resei Premer-Ministri Mihail Mishýstin, Tájikstan Premer-Ministri Kohir Rasýlzoda, Ózbekstan Premer-Ministri Abdýlla Aripov, Armeniia vitse-premer-ministri Mger Grigorian, Túrikmenstan ministrler kabineti tóraǵasynyń orynbasary Rashid Meredov, TMD atqarýshy hatshysy Sergei Lebedev qatysty.
TMD aiasyndaǵy ekonomikalyq ózara is-qimyldyń ózekti máseleleri jáne TMD-nyń 2030 jylǵa deiingi kezeńge arnalǵan Ekonomikalyq damý strategiiasynyń birinshi kezeńin iske asyrý jónindegi is-sharalar jospary talqylandy.
Otyrys qorytyndysy boiynsha radioaktivti materialdardy transshekaralyq tasymaldaý, TMD-ǵa qatysýshy memleketterdiń qoǵamdy tsifrlyq damytý salasyndaǵy aqparattyq ózara is-qimyly týraly kelisimder, sondai-aq atom energetikasynda, aýyl sharýashylyǵynda, kólik sektorynda, mashina jasaýda jáne basqa da salalarda yntymaqtastyqty nyǵaitý jónindegi sheshimder qabyldandy. TMD ÚBK kelesi otyrysyn 2021 jylǵy mamyrda Minsk qalasynda ótkizý josparlanyp otyr.
