QR Tsifrlyq damý, innovatsiialar jáne aeroǵarysh ónerkásibi ministrliginiń Telekommýnikatsiialar komiteti abonentke tirkelmegen SIM karta taratqan uialy operatorlardyń keibir dillerlerin tekserýdi aiaqtady, dep habarlaidy "Ult aqparat".
Nátijesinde 4 saýda núktesine, sonyń ishinde «Tehnodom» jáne «Mechta» elektronika dúkenderine aiyppul salyndy. Telekommýnikatsiialar komiteti elimizde 42 mln SIM karta satylǵanyn anyqtady. Eger olardy halyq sanyna bólse, árqaisysyna 2-3 abonent nómirinen keledi. Biraq, is júzinde bári basqasha.
«Jaqynda iske qosylǵan arnaiy servis arqyly azamattar birneshe myń nómirdiń iesi ekenin anyqtaýda. Árine, bul azamattar sol nómirler arqyly kimniń, qaida jáne ne úshin qońyraý shalǵanynan habarsyz. Sol sebepti bailanys operatoryna habarlasyp, belgisiz nómirlerdi buǵattaidy. Al, buǵattalǵan SIM kartanyń paidalanýshylary bailanyssyz qalady. Sondyqtan da biz qazaqstandyqtardyń quqyqtaryn qorǵaý úshin osyndai tekserý júrgizý qajet dep esepteimiz», - dedi komitet tóraǵasy Vitalii Iaroshenko.
Sonymen qatar, ministrlik ókili bul máselede azamattardyń da jaýapkershilik tanytýy mańyzdy ekenin atap ótti.
«Abonenttik nómirdi satyp alǵan kezde azamattar shart jasaýdy talap etýi, óz múddelerin qorǵaýy tiis. Óitkeni dilerler kóbinese óz áreketteriniń zańsyz ekenin biledi jáne azamattardyń ańǵaldyǵyn paidalanady. Sondyqtan, SIM kartany satyp alý barysynda tirkeýdi usynbasa ózińiz talap etińiz», - deidi Iaroshenko.
Telekommýnikatsiialar komitetiniń tóraǵasy «zańsyz» SIM kartanyń naryǵyn joiý jónindegi jumystardyń jalǵasatynyn aitty.
Eske sala ketsek, buǵan deiin tatalmysh komitet uialy bailanys qyzmetiniń úzilý sebebin ataǵan bolatyn.
