Kezekten tys Prezident sailaýyna qatysatyn taǵy bir kandidattyń esimi belgili boldy. Ol - Meiram Qajyken, - dep habarlaidy "Ult aqparat".
28 qyrkúiekte "Amanat" Qazaqstan kásipodaqtar dostastyǵy" ÓKM ortalyq atqarý komitetiniń otyrysy ótti. Sol kezde Meiram Qajyken uiym atynan kandidat retinde usynylǵan.
Sputnik Qazaqstan portalyna pikir bildirgen ol sailaýǵa qatysatynyn rastady.
"Iá, sailaýǵa qatysatynym ras. Ótken aptada "Amanat" kásipodaqtar birlestigi sondai sheshim qabyldady. Erteń Ortalyq sailaý komissiiasyna baryp, tirkelemin", - dedi Meiram Qajyken.
Sondai-aq, ol aldaǵy sailaýda jeńiske jetetinine senimdi ekenin aitty.
"Árine, senimdimin. Joldan taimaimyn, eshqandai kelisimge barmaimyn. Tek qana alǵa! Óitkeni maǵan, eń aldymen, kásipodaq músheleri úmit artyp otyr", - dedi úmitker.
Meiram Qajyken 61 jasta, Pavlodar oblysynyń týmasy. Ekonomika ǵylymdarynyń doktory, professor, qazirgi qoǵamdy zertteý institýtynyń direktory, áleýmettik-ekonomikalyq júieni, beiimdelgen ekonomikany damytý jáne Qazaqstan Respýblikasynyń Biryńǵai eńbekaqy tóleý júiesi tujyrymdamasy jónindegi kitaptardyń avtory. Meiram Qajyken Yntymaq partiiasyn qurý jónindegi bastamashyl toptyń kóshbasshysy.
Aita keteiik, Qazaqstan Prezidenti Qasym-Jomart Toqaev 1 qyrkúiekte kezekten tys Prezident sailaýy ótetinin jariialaǵan. Ótken aptada sailaý 20 qarashaǵa belgilengen.
Ázirge Prezident sailaýyna kandidat retinde tirkelgisi keletin eki úmitker bar. 30 qyrkúiekte bilikshil "Aýyl" partiiasy Jigýli Dairabaevty usynǵan. Al 1 qazanda "oppozitsiialyq" JSDP osy partiianyń Astanadaǵy bólimshesiniń basshysy Nurlan Áýesbaevty usynǵan.
